Sohbatpur mein 21 September se paanch roza insdad-e-Polio muhim, Deputy Commissioner Farida Tareen ne iftitah kiya

Sohbatpur: Deputy Commissioner Sohbatpur Farida Tareen ne bachay ko Polio vaccine ke qatray pila kar zila Sohbatpur mein 21 September se shuru hone wali paanch roza insdad-e-Polio muhim ka baqaida iftitah kar diya. Is moqe par mehkama Sehat ke afsaran, zilai Polio team ke zimmedaran aur mutaliqa hukkam bhi mojood the.

Deputy Commissioner Farida Tareen ne kaha ke Polio aik khatarnak aur naqabil-e-ilaaj marz hai, taham barwaqt aur mukammal vaccination ke zariye bachon ko is mauzi marz se mahfooz rakha ja sakta hai. Unhon ne walidain par zor diya ke woh apne paanch saal se kam umr tamam bachon ko har Polio muhim ke dauran qatray lazmi pilwaen taake bachon ko umar bhar ki maazoori se mahfooz rakha ja sake.

Unhon ne Polio teamon ko hidayat ki ke muhim ke dauran zila bhar ke tamam dehi o door daraz ilaqon aur abadiyon tak rasai yaqeeni banai jaye aur koi bhi bachcha Polio ke hifazati qatron se mehroom na rahe. Unhon ne field teamon ki karkardagi ki moassir nigrani, teamon ki barwaqt rawangi aur ghar ghar ja kar bachon ko qatray pilane ke amal ko yaqeeni banane par bhi zor diya.

Deputy Commissioner ne kaha ke Polio ke khatme ke liye zilai intizamia, mehkama Sehat, walidain, asatiza, ulema kiram aur muashre ke tamam tabqaat ko apna bharpoor kirdar ada karna hoga. Unhon ne awam se appeal ki ke Polio teamon ke sath mukammal taawun karen, kyunke bachon ka mahfooz aur sehatmand mustaqbil hum sab ki mushtarka zimmedari hai, aur insdad-e-Polio muhim mein kisi qisam ki ghaflat ya kotahi bardasht nahin ki jaye gi.

Tasveer: Bashukriya DG PR Balochistan