Sibi: Deputy Commissioner Major (r) Ilyas Kabzai ki nigrani mein BSDI Phase III ke mansoobon ke tenders mukammal

Sibi: Chief Minister Balochistan ke vision ke tahat awami zaruriyat ke mutabiq taraqqiyati mansoobon par tez raftar amalderamad ke silsile mein Balochistan Special Development Initiative (BSDI) Phase III ke manzoor shuda mansoobon ke tenders Deputy Commissioner Sibi Major (r) Ilyas Kabzai ki sadarat o nigrani mein shaffaf andaz mein mukammal kiye gaye.

Tender opening ke amal mein Wing Commander 52 Wing Colonel Zubair, Wing Commander 63 Wing Colonel Shahryar, Wing Commander 122 Wing Colonel Abdul Mannan, Assistant Commissioner Sibi Mansoor Ali Shah, mehkama Local Government, Communication and Works (C&W), Urban Planning and Development aur mehkama Irrigation ke afsaran aur mutaliqa thekedaron ne shirkat ki.

Mehkama Local Government, Urban Planning and Development, Irrigation aur C&W ke tenders munaqid kiye gaye. Pehle tamam boli dehandgan ke technical documents ka tafseeli jaiza liya gaya, jis ke baad ahal qarar pane wale thekedaron ke financial bids khole gaye. Qawaid o zawabit aur mukammal shaffafiyat ko yaqeeni banate hue kam tareen boli dene wale ahal thekedaron ko mansoobe allot kiye gaye.

Is moqe par Deputy Commissioner Sibi Major (r) Ilyas Kabzai ne kaha ke Chief Minister Balochistan ke taraqqiyati vision aur BSDI ke pehle aur doosre marhale ki kamyabi ke baad ab BSDI Phase III ka baqayada aghaz ho chuka hai. Awami khuli kacheriyon mein awam ki nishandehi par manzoor kiye gaye mansoobe ilaqe ki haqiqi zaruriyat ko madde nazar rakhte hue shuru kiye ja rahe hain, jin ki barwaqt aur miyari takmeel yaqeeni banayi jaye gi.

Unhon ne mutaliqa mehkamon aur thekedaron ko hidayat ki ke tamam mansoobon par shaffafiyat, miyar aur muqarrara muddat ke mutabiq amalderamad yaqeeni banaya jaye taake awam ko jald az jald in taraqqiyati mansoobon ke samraat maisar aa saken.

Tasveer: Bashukriya DGPR Balochistan