Sevi: Tehsil Lehri ke 8 primary schoolon ka achanak daura, asatiza o talba ki hazri aur taleemi istedad ki jaanch

Sevi: Deputy Commissioner Sevi Major (r) Ilyas Kubzai ki khusoosi hidayat aur District Education Officer Sevi Abdul Sattar Langov ke ahkamat ki roshni mein Deputy District Education Officer Lehri Liaquat Ali Lughari ki jaanib se tehsil Lehri ke schoolon ke achanak dauron ka silsila rozana ki bunyad par jari hai.

Is silsile mein unhon ne Government Boys Primary School Garhi Muhammad Bakhsh, Qazi Mir Wah, Barra, Bhind Jagir, Gola Wah, Bango Basham, Khair Wah aur Jumma Khan Gola ka tafseeli daura kiya. Daure ke dauran talba aur asatiza ki hazri check ki gayi, class rooms mein taleemi sargarmiyon ka jaiza liya gaya aur talba se nisab ke mutabiq sawalat puchh kar un ki taleemi istedad jaanchi gayi.

Deputy District Education Officer ne asatiza ko hidayat ki ke ilaqe ke zyada se zyada bachchon ko schoolon mein dakhil karaya jaye taake koi bachcha taleem se mehroom na rahe. Unhon ne talba ko bataya ke rawan saal imtihanat jald munaqid kiye jayenge, is liye woh parhai par bharpoor tawajja den, aur asatiza o talba par mehnat, diyanatdari aur zimmedari ke sath taleemi sargarmiyan jari rakhne par zor diya.

Tasveer: Bashukriya DGPR Balochistan