Sevi: Government Boys Model High School mein Yaum-e-Asatiza ki taqreeb, principal Muhammad Arif Baig ka khitab

Sevi: Government Boys Model High School Sevi mein guzishta roz Yaum-e-Asatiza aqeedat o ehteram aur purwaqar andaz mein manaya gaya, jis mein asatiza aur talba ne shirkat ki aur asatiza ke maqam aur taleemi o tarbiyati khidmaat ko kharaj-e-tehseen pesh kiya.

Taqreeb se khitab karte hue school ke principal Muhammad Arif Baig aur deegar muqarrireen ne muashre ki tameer o taraqqi mein asatiza ke bunyadi kirdar par roshni dali. Unhon ne kaha ke ustad ek nasl ki taleem o tarbiyat ke sath talba ki kirdar sazi aur unhein mustaqbil ke challenges ke liye tayyar karne mein aham kirdar ada karta hai.

Muqarrireen ne talba par zor diya ke woh asatiza ka hamesha ehteram karein, un ki rehnumai se bharpoor istifada karein aur ilm o akhlaq ko zindagi ka hissa banayein, kyunke ustad ki izzat aur ilm ka hasool ek mohazzab, bashuoor aur kamyab muashre ki bunyad hai. Taqreeb mein asatiza ki khidmaat ko saraha gaya aur talba ko taleem, nazm o zabt aur asatiza ke ehteram ki ahmiyat se agah kiya gaya.

Tasveer: Bashukriya DGPR Balochistan