Sevi: District Health Committee ijlas, ghair hazir tibbi amle ki tankhwahon se katauti ke ahkamat

Sevi: Assistant Commissioner Mir Bahadur Khan Bangulzai ki zer-e-sadarat District Health Committee ka ijlas munaqid hua, jis mein District Health Officer Dr Abdul Qadir Haroon, Additional District Health Officer Dr Zeeshan Bashir, MS DHQ Hospital Dr Jahanzeb Khan Baloch aur M&E Officer PPHI Lala Samad Khan samet mehkama Sehat ke deegar mutaliqa afsaran ne shirkat ki.

Ijlas mein zila bhar ke hospitalon, buniyadi marakiz-e-sehat (BHU) aur dehi marakiz-e-sehat (RHC) mein faraham ki jane wali tibbi sahuliyat, staff ki hazri, adviyat ki dastiyabi, safai suthrai aur sehat ki sahuliyat ki mujmui surat-e-haal ka tafseeli jaiza liya gaya. Mutaliqa afsaran ne apne apne idaron aur marakiz-e-sehat ki karkardagi par Assistant Commissioner ko briefing di.

Assistant Commissioner ne kaha ke awam ko miyari aur ba-waqt tibbi sahuliyat ki faraahmi intizamia aur mehkama Sehat ki awwaleen zimmedari hai, aur door daraaz ilaqon ke awam ko sehat ki buniyadi sahuliyat ki faraahmi mein kisi qism ki ghaflat ya kotahi bardasht nahin ki jaye gi. Unhon ne hidayat ki ke tamam hospitalon, BHUs aur RHCs mein doctors, paramedical staff aur deegar amle ki hazri yaqeeni banai jaye, mareezon ko adviyat aur zaroori tibbi sahuliyat ki faraahmi mein rukawat na aane di jaye aur sehat marakiz mein safai suthrai aur deegar buniyadi sahuliyat ko behtar banaya jaye.

Unhon ne kaha ke sehat ke shobe mein behtari ke liye field monitoring ko mazeed mu’assir banaya jaye aur afsaran baqaidagi se marakiz-e-sehat ka daura kar ke masail ki nishandahi aur un ke fori hal ko yaqeeni banayen. Faraiz mein ghaflat, ghair hazri aur tibbi sahuliyat ki faraahmi mein kotahi par zimmedar ahalkaron ke khilaf qawaid o zawabit ke mutabiq karrawai amal mein layi jaye gi.

Ijlas ke dauran ghair hazir aur faraiz mein ghaflat ke murtakib ahalkaron ke khilaf karrawai samet tankhwahon se katauti ke ahkamat bhi jari kiye gaye. Assistant Commissioner ne kaha ke hukumat sehat ke shobe mein awam ko behtar sahuliyat ki faraahmi ke liye iqdamat kar rahi hai, jin ke samraat awam tak pohanchane ke liye tamam mutaliqa idaron ko apni zimmedariyan mu’assir andaz mein ada karna hongi. Ijlas mein marakiz-e-sehat ki karkardagi behtar banane aur sehat ke nizam ko mazeed mu’assir banane se mutaliq mukhtalif umoor par ghaur kiya gaya aur zaroori hidayat jari ki gayin.

Tasveer: bashukriya DGPR Balochistan