Sevi: District Education Group Committee ijlas, mustaqil ghair hazir asatiza ki tankhwahon se katauti ka hukm

Sevi: Assistant Commissioner Mir Bahadur Khan Bangulzai ki zer-e-sadarat District Education Group Committee ka ijlas munaqid hua, jis mein District Education Officer Abdul Sattar Lango, Deputy District Education Officers Muhammad Tariq, Abdul Nabi aur Lehri se Liaqat Ali Lughari, Deputy District Education Officer Female Irum Noreen aur PMU/TKF ke District Coordinator Muhammad Younus samet mehkama Taleem ke deegar afsaran ne shirkat ki.

District Education Officer ne zila bhar mein band schoolon, asatiza ki hazri, mustaqil ghair hazir asatiza aur jari o mujawwaza taraqqiyati mansubon par tafseeli briefing di. District Coordinator Muhammad Younus ne schoolon mein izafi kamron ki tameer ki pesh raft se agah karte hue bataya ke 70 schoolon ka survey aur 60 schoolon ki verification mukammal ki ja chuki hai.

Unhon ne bataya ke mutaliqa schoolon ke accounts mein funds ki muntaqili ka amal shuru ho jaye ga, taham baaz schoolon ke joint accounts ke hawale se masail darpesh hain. Joint accounts khulne ke baad mutaliqa schoolon ko cheques faraham kar diye jayenge.

Assistant Commissioner ne kaha ke Taleem ke shobe mein kisi qisam ki ghaflat ya kotahi bardasht nahin ki jaye gi. Sarkari schoolon mein asatiza aur deegar amle ki barwaqt hazri ko har surat yaqeeni banaya jaye, kyunke asatiza ki baqaida hazri hi talba ko miyari Taleem ki faraahmi ki bunyadi zamanat hai.

Unhon ne hidayat ki ke band schoolon ko faal banane, ghair hazir asatiza ke khilaf zabte ke mutabiq karrawai aur schoolon mein taleemi sargarmiyon ki moassir nigrani ko yaqeeni banaya jaye, aur mustaqil ghair hazir asatiza ki tankhwahon se qawaid o zawabit ke mutabiq katauti ke ahkamat bhi jari kiye. Unhon ne kaha ke izafi kamron ki tameer samet jari taraqqiyati mansubon ko muqarrara miyar ke mutabiq mukammal kiya jaye aur afsaran field mein schoolon ke baqaidagi se daure karen. Ijlas mein taleemi idaron ki karkardagi aur aainda ke laiha-e-amal par bhi ghaur kiya gaya.

Tasveer: Bashukriya DGPR Balochistan