Sevi: Aainda Polio muhim mein 43 hazar 192 bachchon ko qatre pilane ka hadaf, majoliyati sample manfi

Sevi: Assistant Commissioner Mir Bahadur Khan Bangulzai ki zer-e-sadarat aainda Polio muhim ke intezamat ke hawale se ijlas mun’aqid hua, jis mein DHO Dr Qadir Haroon, ADHO Dr Zeeshan Bashir, N-Stop Officer Dr Shahzada Kamran, MS DHQ Teaching Hospital Dr Jahanzaib Gashkori, DPO Salahuddin Marri, District Coordinator ISD Mir Waees Khan, District Coordinator SRIP Arslan Lashari aur M&E Officer Lala Samad Khan samet dusre mutaliqa mahkamon ke afsaran ne shirkat ki.

N-Stop Officer Dr Shahzada Kamran ne May mein mun’aqid hone wali guzishta Polio muhim ki karkardagi aur aainda muhim ke intezamat par tafseeli briefing di. Unhon ne bataya ke Sevi se hasil kiye gaye majoliyati sample ka nateeja bhi manfi (Negative) aaya hai.

Briefing ke mutabiq aainda muhim ke dauran 22 transit points, 46 fixed sites aur 216 mobile teamein tashkeel di gayi hain, jabke 62 area incharges aur 25 UCMOs muhim ki nigrani karenge. Muhim ke dauran 43 hazar 192 bachchon ko Polio se bachao ke qatre pilane ka hadaf muqarrar kiya gaya hai.

Assistant Commissioner Mir Bahadur Khan Bangulzai ne kaha ke Polio ke mukammal khatme ke liye murabbat hikmat-e-amali aur mu’assir nigrani zaroori hai. Unhon ne tamam mutaliqa mahkamon ko hidayat ki ke Polio teamon ko security samet tamam zaroori sahuliyat faraham ki jayen aur muqarrara hadaf ke husool ko yaqeeni banaya jaye. Unhon ne walidain se apeal ki ke apne paanch saal tak ki umar ke tamam bachchon ko Polio se bachao ke qatre zaroor pilwayen aur Polio teamon ke sath bharpoor taawun karen.

Tasveer: bashukriya DGPR Balochistan