Secretary Muwasilat o Taamirat Babar Khan ka Rakhni Town uplifting aur bazar remodelling project par kaam tez karne ka hukum

Quetta: Secretary Muwasilat o Taamirat Balochistan Babar Khan ki zer-e-sadarat Uplifting of Rakhni Town o Remodelling of Rakhni Bazar project ke hawale se ek aham jaiza ijlas munaqid hua. DC Barkhan ne bazariya Zoom ijlas mein shirkat ki, jabke Chief Engineer Loralai Zhob Zone Qazi Noor ul Haq, SE Barkhan o Musakhel Abdul Razzaq Mandokhel, Executive Engineer Barkhan Engineer Fazal Karim, mutaliqa consultant aur deegar afsaran bhi mojood the.

Ijlas mein project par hone wali pesh raft, taamirati sargarmiyon, darpesh challenges aur aainda ke laaiha-e-amal se aagah kiya gaya. Briefing mein bataya gaya ke project ki barwaqt takmeel ke liye kaam jari hai aur miyar par kisi qism ka samjhauta nahin kiya jaye ga.

Rakhni bataur Divisional Headquarter

Secretary Muwasilat o Taamirat Babar Khan ne kaha ke Koh-e-Sulaiman Division ke qiyam ke baad Rakhni ko bataur Divisional Headquarter khusoosi ahmiyat hasil hui hai, is liye shehar ki bunyadi sahuliyat, sarkon, nikasi-e-aab, bazaron aur shehri dhanche ki behtri naguzeer hai. Unhon ne hidayat ki ke Rakhni shehar ko jadeed khutoot par ustuwar karne ke liye project par kaam ki raftar mazeed tez ki jaye aur miyar yaqeeni banaya jaye.

Unhon ne kaha ke jahan jahan kaam ke mawaqe hasil hain wahan poori raftar se kaam tez kiya jaye aur team work ke sath kaam kiya jaye taake yeh aham project muqarrara waqt par mukammal ho. Unhon ne Deputy Commissioner Barkhan ko ek joint committee banane ki bhi hidayat ki jo project ki har zaviye se jaanch partal kare aur khamiyan door ki jayen.

Babar Khan ne kaha ke soobai hukumat ki awwalin tarjeeh Rakhni shehar ko daur-e-hazir ki jadeed sahuliyat se hum aahang karna hai, jis ke tehat kushada sarkein, moassir street lights, miyari bypass aur markazi bazar mein dukanon aur rehri banon ke liye alag aur munazzam jagah faraham ki jaye gi. Unhon ne azm zahir kiya ke Rakhni shehar mein jari taraqqiyati projects barwaqt mukammal kar ke awam ko relief faraham kiya jaye ga taake pasmanda ilaqon ki taraqqi aur khushhali ka khwab sharminda-e-tabeer ho.

Tasveer: bashukriya DGPR Balochistan