Secretary Labour ka Social Security Hospital Hub ka surprise daura, teen mah mein sahuliyat behtar banane ka elan

Hub: Secretary Labour Welfare Saleh Muhammad Baloch ne Commissioner Imran Ibrahim Bangulzai ke hamrah Social Security Hospital Hub ka surprise daura kiya, masail ka jaiza liya aur shikayat ke izale ke liye fori ahkamat jari kiye. Daure ke mauqe par Employees Social Security Institution (BESSI) Balochistan ke Commissioner Imran Ibrahim Bangulzai ne hospital ko darpesh masail par unhein briefing di.

Secretary Labour ne hospital ke intizami umoor, mazdooron ko faraham ki jane wali tibbi sahuliyat aur darpesh masail se mutaliq mareezon se bhi malumat hasil kin, aur MS Social Security Hospital, mazdoor union aur governing body ke numaindon ke sath tafseeli meeting ki jis mein hospital ke muamlat aur mazdooron ki mushkilat par taweel guftagu hui.

Mazdoor union ke mutalibat

Mazdoor union ke numainda ne Secretary Labour ko bataya ke registered 14 hazar labourers ki numainda ke liye governing body mein kam az kam do members ka talluq zila Hub se hona chahiye taake hukumati policy se mazdooron ko relief mile. Governing body ke ek rukn ne bataya ke mazdooron ke death grant ke cases kafi arse se Secretary Workers Welfare Board ki files mein pare hain jin par karrawai ki zaroorat hai.

Secretary ne fori ahkamat jari karte hue kaha ke mazdooron ke huqooq par koi samjhota nahin kiya jaye ga, death grant samet Hajj quota aur Scholarship ke hawale se Chief Minister Balochistan ki policy wazeh hai, Hub ke mehnat kash mazdooron ko mayoos nahin hone denge, un ki jaiz shikayat ka izala kiya jaye ga aur hospital ke intizami muamlat se mutaliq mazdoor union ki tajaweez par bhi ghaur kiya jaye ga.

Commissioner Social Security Imran Ibrahim Bangulzai ne mazdooron ke ilaj muajle aur zaroorat mand mareezon ko panel ke zariye Karachi muntaqil karne jaise muamlat par mazdoor union numainda ki maujoodgi mein Secretary ko briefing di.

Indus Hospital ke hawale karne ki tajweez zer-e-ghaur

Secretary Labour ne kaha ke Social Security Hospital ka bunyadi maqsad registered mazdooron aur un ke ahl-e-khana ko barwaqt aur miyari tibbi sahuliyat faraham karna hai, is liye hospital ke intizami masail ko mamooli nauiyat ka muamla samajhne ke bajaye sanjeedgi se hal karne ki zaroorat hai. Unhon ne elan kiya ke hospital ko public private partnership ke tahat Indus Hospital ke hawale karne ki tajweez zer-e-ghaur hai, taham Health department ke zer-e-nigrani hospital ki modernization ke liye fori iqdamat kiye ja rahe hain aur aainda teen mah ke andar sahuliyat ki faraahmi mein behtri dekhne mein aaye gi.

Secretary ne hospital ke medicine store ka charge fori taur par senior pharmacist ke hawale karne ke ahkamat bhi jari kiye.

Tasveer: Bashukriya DG PR Balochistan