Secretary Communication and Works Babar Khan ka Fortification of Thana ke 83 projects ka jaiza, sust engineers ko show cause

Quetta: Secretary Communication and Works Babar Khan ne kaha hai ke soobe ki taraqqi aur khushhali mein Communication and Works Department ka kirdar nihayat aham hai aur infrastructure ki behtari aur paidar taraqqi ka inhisar mehkame ki moassir karkardagi par hai. Agar is karkardagi mein sustee ya kotahi ho to soobe ki taraqqi ka pahiya jaam ho jayega jo kisi soorat qabil-e-qubool nahin.

Woh soobe mein jari strategic projects Fortification of Thana ki pesh raft se mutaliq jaiza ijlas ki sadarat kar rahe the, jis mein tamam chhe zones ke Chief Engineers, AIG Development Ahmed Sultan, Superintending Engineers aur zilai Executive Engineers ne bazariya zoom shirkat ki. Mukhtalif Azla ke engineers ne Fortification of Thana ke 83 projects par pesh raft ke bare mein briefing di aur maali o takneeki masail se agah kiya.

Secretary ne hidayat ki ke aham nauiyat ke projects ki takmeel mein kisi qisam ki sust roi bardasht nahin ki jayegi. Unhon ne kaha ke waqt kam aur challenges zyada hain, lihaza engineers projects ki barwaqt takmeel ko awwaleen tarjeeh banayein aur tamam takneeki masail fori hal kiye jayein.

Babar Khan ne sust roi ka shikar Executive Engineers ko show cause notice bhi jari kiye aur Executive Engineers Buildings ko timeline dete hue kaha ke muqarrara muddat tak projects ki takmeel har soorat yaqeeni banayi jaye,ba soorat-e-deegar mutaliqa hukkam ke khilaf sakht karrawai ki jayegi. Unhon ne kaha ke projects ke miyar par koi samjhauta na kiya jaye.

Unhon ne Chief Engineers aur SEs ko hidayat ki ke woh khud projects ka baqaidagi se daura karein aur har do hafte baad pesh raft report irsal karein, jis mein takneeki masail ki nishandehi bhi shamil ho taake kaam bila tatal jari rahe.

Tasveer: Bashukriya DG PR Balochistan