Secretaries Committee ijlas: Naukri biki to koi wazir bachega na secretary, Chief Minister Sarfraz Bugti

Quetta: Chief Minister Balochistan Mir Sarfraz Bugti ne kaha hai ke Balochistan mein kisi nojawan ki naukri farokht nahin hone di jayegi. Naukriyon ki khareed o farokht ke musaddaqa shawahid samne aaye to koi wazir bachega na koi secretary, aur mulawwis anasir ke khilaf ghair janibdarana tehqiqat ke baad qanoon ke mutabiq sakht karrawai hogi. Unhon ne wazeh kiya ke sooba ke nojawanon ke mustaqbil aur haq-e-rozgar par kisi qism ka samjhauta qabil-e-qubool nahin.

Chief Minister ne yeh baat Secretaries Committee ke ijlas ki sadarat karte hue kahi, jis mein soobai mehkamon ki karkardagi, salana taraqqiyati program ki physical o financial pesh raft, bharti’on ke amal aur mukhtalif intizami umoor ka jaiza liya gaya. Ijlas mein soobai wazir taraqqiyat o mansooba bandi Mir Zahoor Ahmed Buledi, wazir khazana Mir Shoaib Nushirwani aur Chief Secretary Balochistan Shakeel Qadir Khan samet tamam mehkamon ke intizami secretaries shareek hue.

Mehkama jangalat ki bharti’on par tehqiqat ka hukm

Chief Minister ne mehkama jangalat mein bharti’on se mutaliq be-zabtagiyon ki shikayat ka sakht notice lete hue aala satahi tehqiqat ka hukm diya. Unhon ne kaha ke agar musaddaqa shawahid aur ghair janibdarana tehqiqat ke nateeje mein kisi ka jurm sabit hua to mulawwis kirdar kisi soorat saza se nahin bach sakenge.

Mir Sarfraz Bugti ne kaha ke unhon ne roz-e-awwal hi wazeh kar diya tha ke Balochistan mein koi naukri nahin bikegi, aur is usooli mauqif par soobai cabinet ke arkan, Chief Secretary aur poori hukumati machinery ek page par hai. Naukriyon ki khareed o farokht rokne ke liye har tarah ka dabao bardasht karenge, taham nojawanon ke haq par koi samjhauta nahin hoga.

Officers se mukhatib hote hue Chief Minister ne kaha ke bahaisiyat Chief Minister unhon ne hukumati umoor mein kabhi kisi zati mudakhlat ko bardasht nahin kiya. Un ke bhai bhi kabhi Secretariat mein kisi sarkari ya nijji kaam ke liye nazar nahin aayenge. Chief Minister Secretariat se kisi khilaf-e-qanoon kaam ke liye kisi officer se rabta nahin kiya jata, aur agar kisi secretary ko phone ya approach ki gayi hai to woh bila khauf o khatar is ba-ikhtiyar forum par bata sakta hai. Unhon ne kaha ke itni intizami ba-ikhtiyari ke bawajood koi saqam ho to governance par sawalat uthte hain.

Chief Minister ne kaha ke hukumat mein merit, shaffafiyat aur qanoon ki baaladasti par koi samjhauta nahin hoga aur kisi ko zati talluq ya asar o rusookh ki bunyad par sarkari umoor par asar andaz hone ki ijazat nahin di jayegi. Unhon ne kaha ke officers par unhein mukammal aitmad hai, wohba-salahiyat hain aur Balochistan ko durust simt mein le jane ki salahiyat rakhte hain. Secretaries ki satah par naukriyon ki khareed o farokht ka ilzam na-qabil-e-fahm aur kisi aala intizami ohde ke shayan-e-shan nahin; secretaries ki niyat aur musbat kirdar par koi shak nahin, taham matehat ahalkaron aur recruitment committees ki karkardagi par kari nazar rakhne ki zaroorat hai.

Unhon ne kaha ke awam aur parliamentary forum par ki gayi commitment ke tanazur mein kisi bhi satah par koi be-zabtagi qata’i bardasht nahin. Secretaries ka ehtiram o izzat azeez hai aur secretaries ko bhi hukumati policyon aur ahkamat par amal karte hue takreem karni hogi. Chief Minister ne kaha ke Balochistan ke nojawan sardi mein thithurte aur garmi mein jhulaste hue Taleem aur mehnat ke baad rozgar ke muntazir rehte hain, un ki naukri farokht hone dena kisi soorat qabil-e-qubool nahin.

Grade paanch se upar bharti’an artificial intelligence ke zariye

Chief Minister ne hidayat ki ke hukumati ahkamat par mukammal amalderamad aur bharti’on ke poore amal ko shaffaf aur merit par mabni rakha jaye. Grade paanch se balai tamam asamiyon par artificial intelligence ke zariye merit par bharti’on ki manzoor shuda policy par bila taakhir amal kiya jaye aur test maqami satah par munaqid hon. Tamam mehkame test ke liye zaroori intizamat karen, aur muawanat darkar hui to Chief Minister Secretariat mukammal taawun faraham karega.

Unhon ne wazeh kiya ke darja chaharum ki asamiyon par na iqraba parwari hogi aur na hi recruitment committee ka koi hissa hoga. Naukriyon ki khareed o farokht ke mamle mein ghalti ki koi gunjaish nahin aur is par koi mafi nahin hogi. Mir Sarfraz Bugti ne tamam secretaries ko hidayat ki ke woh Allah ko hazir o nazir jaan kar halaf uthayen ke Balochistan ke nojawanon ki naukriyan farokht nahin hone denge, aur kisi dabao ko merit aur shaffafiyat ki rah mein haail na hone den.

Chief Minister ne Chief Secretary Shakeel Qadir Khan ke kirdar ko sarahte hue kaha ke hukumati machinery mein bator Chief Principal Advisor unhon ne hamesha behtar mushawarat aur good governance ke qiyam ke liye muawanat faraham ki. Soobai hukumat aur intizami officers ke darmiyan mauassir mushawarat aur bahmi taawun se hi hukumati policyon par mauassir amalderamad mumkin hai.

Ijlas mein salana taraqqiyati program ki physical aur financial pesh raft ka bhi jaiza liya gaya. Chief Minister ne taraqqiyati program par amalderamad ki raftar mein tezi ko hukumat ke amali iqdamat ka mazhar qarar diya aur mehkamon ko mansoobon ki ba-waqt takmeel yaqeeni banane ki hidayat ki. Unhon ne mehkama Planning and Development ki digitalization par soobai wazir Mir Zahoor Ahmed Buledi aur Additional Chief Secretary Taraqqiyat Zahid Saleem ki kawishon ko saraha aur kaha ke jadeed Technology ka istemal shaffafiyat, mauassir nigrani aur behtar faisla sazi ke liye aham hai.

Mir Sarfraz Bugti ne kaha ke meritocracy qaim kar ke hi nojawanon ka riyasati nizam par aitmad bahal kiya ja sakta hai. Unhon ne officers par zor diya ke woh apne faraiz poori zimmedari, diyanatdari aur ghair janibdari se anjam den aur yaqeeni banayen ke kisi nojawan ke haq par kisi fard, giroh ya dabao ke baais samjhauta na ho.

Tasveer: Bashukriya DGPR Balochistan