Sarfraz Bugti ki qaumi media se guftagu: Aakhri dehshatgard ki maujoodgi tak jang jari rahegi

Quetta: Chief Minister Balochistan Mir Sarfraz Bugti ne kaha hai ke Balochistan mein aakhri dehshatgard ki maujoodgi tak jang jari rahegi. Unhon ne kaha ke dehshatgardi ke khilaf civil aur askari qayadat muttafiq aur yaksu hai aur is maamle par koi ibham ya confusion nahin.

Chief Minister ne in khayalat ka izhar Saturday ko Chief Minister Secretariat mein qaumi media ke anchors, senior sahafiyon aur deegar numainDon se video link ke zariye guftagu karte hue kiya. Is mauqe par soobe ki majmooi surat-e-haal, taraqqiati amal, maadniyat o Kan Kani, Aman o Aman, siyasi maamlaat aur hukumati iqdamaat par tafseeli tabadla-e-khayal kiya gaya.

Wazarti briefings

Is se qabl Chief Minister Secretariat mein soobe ke samaji o iqtisadi shobon, maadniyat o Kan Kani aur Aman o Aman se mutaliq aham briefings munaqid hui, jin mein soobai hukumat ki hikmat-e-amali, jari mansoobon aur awam ko milne wale samaraat ka jaiza liya gaya.

Mansooba bandi o taraqqi ki briefing mein samaji o iqtisadi shobon se mutaliq soobai hukumat ki hikmat-e-amali, governance, service delivery, taraqqiati funds ke mouasir istemal aur taraqqiati mansoobon ke samaraat awam tak pohanchane ke iqdamaat se aagah kiya gaya.

Maadniyat o wasail ki briefing mein Balochistan mein maadniyat aur Kan Kani ke shobe ki istedad, jari mansoobon aur is shobe ki taraqqi ke iqdamaat par tafseeli roshni dali gayi. Bataya gaya ke maadni wasail ko behtar andaz mein baroye kaar la kar soobe ke awam ke liye maashi aur deegar fawaid paida karne ke iqdamaat jari hain.

Dakhla o qabaili umoor ki janib se Aman o Aman ki surat-e-haal, Provincial Action Plan, police islahaat aur Levies Force ke police mein inzimam se mutaliq pesh raft par briefing di gayi, jabke Safe City mansoobe, qanoon sazi aur qanoon nafiz karne wale idaron ke darmiyan mouasir hum ahangi se bhi Chief Minister ko aagah kiya gaya.

Sawal o jawab ka session

Briefings ke baad Chief Minister ke sath tafseeli sawal o jawab ka session hua jis mein qaumi media ke numainDon ne soobe ki majmooi surat-e-haal, Aman o Aman, taraqqi, siyasi maamlaat aur deegar aham umoor par sawalaat kiye. Mir Sarfraz Bugti ne soobai hukumat ke moaqqif aur policy tarjeehaat ki wazahat ki.

Chief Minister ne kaha ke Balochistan mein security forces mushkil halaat mein faraiz anjam de rahi hain aur dehshatgardi ke khilaf jang mein riyasati idaray mukammal hum ahangi ke sath kaam kar rahe hain. Riyasat ke khilaf bandooq uthane walon se kisi soorat baat cheet nahin hogi.

Unhon ne kaha ke Quetta se baith kar poore soobe ko control karna mumkin nahin, Balochistan mein agar naye soobe bante hain to woh lisani nahin balke intizami bunyadon par banne chahiyen. Chief Minister ne kaha ke unhen Balochistan mein kisi dhai dhai saala hukumati muahide ka ilm nahin; hukumat mein tabdeeli ka faisla siyasi qayadat ne karna hai, taham jab tak woh mansab par hain awam ki khidmat jari rakhenge.

Mir Sarfraz Bugti ne kaha ke woh corruption ke mukammal khatme ka daawa nahin kar sakte, taham Balochistan mein maazi ke muqable mein corruption mein kami zaroor aayi hai. Taleemi idaron samet tamam sarkari mahkamon mein merit par amal daraamad yaqeeni banane ke liye iqdamaat kiye ja rahe hain. Unhon ne kaha ke soobe mein taraqqiati mansoobe maazi ke muqable mein record muddat mein mukammal kiye gaye hain aur hukumat ki tawajjoh taraqqiati amal ko mouasir, nateeja khez aur awami zaruriyaat se hum ahang banane par hai.

Ghair mulki shehriyon ki wapsi ka zikr karte hue Chief Minister ne kaha ke Balochistan se 11 lakh Afghan muhajireen samet deegar ghair mulkiyon ko un ke watan wapas bheja gaya hai. Lapata afraad ke maamle par unhon ne kaha ke is masle ko qaumi media aur deegar forums par kabhi kabhi durust tanazur ke baghair bhi pesh kiya jata raha hai jis se surat-e-haal ki durust tasveer samne nahin aati.

Unhon ne wazeh kiya ke dehshatgardi kisi ek soobe ka nahin balke poore Pakistan ka masla hai aur is ke khatme ke liye qaumi satah par mushtarka koshishon ki zaroorat hai.

Tasveer: Bashukriya DGPR Balochistan