Sarfraz Bugti ki Nawan Killi tayyara haadsay mein jaanein bachane wale naujawan Hikmatullah se mulaqat

Quetta: Chief Minister Balochistan Mir Sarfraz Bugti se Nawan Killi mein tarbiyati tayyare ke haadsay ke dauran insani jaanein bachane ke liye aage barhne wale naujawan Hikmatullah ne mulaqat ki.

Wazir-e-aala ne naujawan ki bahaduri aur jurat ko sarahte hue hukumat Balochistan ki janib se unhein tareefi certificate pesh kiya. Unhon ne kaha ke unhein aise bahimmat naujawanon par fakhr hai jo mushkil aur hangami halaat mein apni jaan ki parwa kiye baghair doosron ki madad ke liye aage barhte hain.

Unhon ne kaha ke Hikmatullah jaise naujawan Balochistan ka qabil-e-fakhr sarmaya aur doosron ke liye qabil-e-taqleed misaal hain.

Security forces se wabastagi

Wazir-e-aala ne kaha ke security forces mulk o qaum ke tahaffuz aur ek mahfooz o roshan mustaqbil ke liye qurbaniyan de rahi hain. Nawan Killi mein tayyara haadsay ke maqam par insani jaanein bachane ke liye naujawanon ka aage barhna is haqiqat ka amli izhar hai ke Balochistan ke awam apni security forces ke sath mohabbat aur wabastagi rakhte hain.

Sarfraz Bugti ne kaha ke bebunyad propaganda ke zariye Balochistan ke awam aur security forces ke darmiyan fasle paida karne ki koshishein haqiqat ke bar-aks hain. Aise waqiat is amr ki akkasi karte hain ke Balochistan ke awam har jagah aur har haal mein apni bahadur security forces ke shana bashana khare hain.

Unhon ne kaha ke insaniyat ki khidmat, jurat aur doosron ki jaan bachane ke liye amli kirdar ada karna qabil-e-tahseen amal hai. Unhon ne azm zahir kiya ke muashre mein aise musbat kirdaron ki hausla afzai jari rakhi jaye gi taake naujawanon mein khidmat-e-khalq, zimmedari aur qaumi yakjehti ke jazbat mazeed farogh payein.