Sardar Bahadur Khan University Quetta mein “Naqoosh-e-Watan” seminar, wafaqi wazir Aurangzeb Khan Khichi ka khitab

Quetta: Balochistan Centre of Excellence, hukumat-e-Balochistan aur Pakistan Poverty Alleviation Fund ke ishtirak se Sardar Bahadur Khan University mein aham seminar munaqid hua, jis ka maqsad qaumi saqafati bayania ki ahmiyat ujagar karna, ise farogh dena aur naujawanon o talba ko musbat, tameeri aur muassir kirdar ke liye mutaharrik karna tha.

Seminar mein wafaqi wazir bara-e-qaumi wirsa o saqafat Aurangzeb Khan Khichi, wazir-e-Taleem Balochistan Rahila Hameed Durrani, CEO Pakistan Poverty Alleviation Fund Nadir Gul Barech, Federal Secretary Asad Rehman Gilani, Chief Coordination Officer Balochistan Centre of Excellence Dr Dost Muhammad, Deputy Coordination Officer Dr Ismat Khan, Vice Chancellor Sardar Bahadur Khan University Professor Dr Robina Mushtaq, Executive Director Lok Virsa Dr Muhammad Waqas Saleem aur incharge Rehabilitation Centre Fehmida Kakar ne shirkat ki.

Mehman-e-khusoosi Aurangzeb Khan Khichi ne kaha ke Balochistan Pakistan ki saqafati shanakht ka hashiya nahin balke is ka bunyadi baab hai, aur Balochistan ke baghair Pakistan ki tareekh, tehzeeb aur qaumi shanakht ki tasveer mukammal nahin ho sakti. Unhon ne kaha ke hum aisa Pakistan chahte hain jis mein kisi shehri ko yeh mehsoos na ho ke is ki zaban, saqafat ya ilaqai shanakht ko nazar andaz kiya ja raha hai.

Wazir-e-Taleem Rahila Hameed Durrani ne kaha ke saqafat ko kabhi taqseem ka zariya nahin banana chahiye balke yeh logon ko jodne ka behtareen waseela hai, tamam saqafaton ka ehtram aur bahmi ittehad ka farogh nagzeer hai, aur Balochistan apne rawayati hunar, dastkari aur siyahat ke zariye saqafati tanawwu se asani se amdani hasil kar sakta hai.

PPAF ke CEO Nadir Gul Barech ne kaha ke un ka idara Balochistan ke 41 Azla mein paidar taraqqi, samaji hum ahangi aur aman ke farogh ke liye kaam kar raha hai. Hunar mand afrad, khusoosan khawateen ko qarze aur tarbiyat dene se woh maashi taur par khudmukhtar ho kar apne khandanon ka sahara ban rahi hain, aur khawateen ko Taleem, maashi khudmukhtari aur qiyam-e-aman mein faal kirdar de kar hi muashra taraqqi kar sakta hai.

Muqarrireen ne qaumi saqafati bayania “Naqoosh-e-Watan” ki ahmiyat aur saqafati farogh par roshni dali, aman, rawayat ke tahaffuz aur paidar taraqqi ke liye khawateen ke kaleedi kirdar ko nagzeer qarar diya, aur Balochistan ke saqafati wirse aur hunar mand khawateen ko maashi taur par khudmukhtar bana kar khitte ki taraqqi ke azm ka aada kiya.

Tasveer: bashukriya DGPR Balochistan