Sanjawi: Assistant Commissioner Marman Kakar ka BISP markaz par chhapa, ghair-qanooni katauti par sakht karrawai ka intibah

Sanjawi: Assistant Commissioner Sanjawi Marman Kakar ne kaha hai ke kisi ko bhi mustahiq khawateen ko un ke huqooq se mehroom karne ya unhein harasan karne ki ijazat nahin di jayegi, aur Benazir Income Support Programme (BISP) ki raqoom mein ghair-qanooni katauti karne wale anasir ke khilaf sakht qanooni aur mehkamana karrawai amal mein layi jayegi.

Tafseelat ke mutabiq mustahiq khawateen ki jaanib se zaid raqam wasool karne aur ghair-qanooni katautiyon se mutaliq mausool hone wali mutaddid shikayat ke baad Assistant Commissioner ne BISP adaigi markaz ka achanak daura kiya aur mauqe par intezamat, adaigiyon ke amal aur mustahiqeen ko faraham ki jane wali sahuliyat ka tafseeli jaiza liya.

Mustahiq khawateen se fardan farda mulaqat

Daure ke dauran Assistant Commissioner ne markaz mein maujood mustahiq khawateen se fardan farda mulaqat ki, un ke masail sune aur adaigiyon ke tareeqa-e-kaar, raqam ki wasooli, amle ke rawaiye aur faraham ki jane wali sahuliyat ke baare mein tafseeli maloomat hasil kien. Unhon ne khawateen ko yaqeen dilaya ke hukumat ki jaanib se faraham ki jane wali imdadi raqam un ka haq hai aur is haq mein kisi qism ki kami ya ziyadti hargiz bardasht nahin ki jayegi.

Assistant Commissioner ne mutalliqa hukkam ko sakhti se hidayat ki ke har mustahiq khatoon ko us ki mukammal imdadi raqam bila kisi katauti, takheer aur rukawat ada ki jaye, jabke khawateen ke sath izzat, ehteram aur khush akhlaqi se pesh aana har ahlkar ki zimmedari hai.

Unhon ne wazeh kiya ke gharib aur mustahiq afraad ke huqooq par kisi ko daka dalne nahin diya jayega. Agar kisi shakhs, agent ya ahlkar ke khilaf zaid raqam wasool karne, ghair-qanooni katauti, mustahiqeen ke istehsal ya khawateen ko harasan karne ki shikayat durust sabit hui to us ke khilaf sakht qanooni aur intizami karrawai ki jayegi aur kisi ke sath riayat nahin barti jayegi.

Shaffafiyat aur bunyadi sahuliyat ki hidayat

Assistant Commissioner ne hidayat ki ke BISP markaz mein shaffafiyat, nazm-o-zabt, saaf suthre mahaul, khawateen ke liye munasib baithne ke intezam, peene ke saaf pani aur deegar bunyadi sahuliyat ki faraahmi har surat yaqeeni banayi jaye taake mustahiq khawateen ko kisi dushwari ka samna na karna pade.

Unhon ne kaha ke awami khidmat, shaffafiyat, ehtesab aur mustahiq afraad ke huqooq ka tahaffuz zilai intezamia ki awwaleen tarjeeh hai, aur BISP raqoom ki shaffaf taqseem yaqeeni banane ke liye achanak douron aur moassir nigrani ka silsila aainda bhi jari rakha jayega taake awam ko un ka haq bila kisi rukawat aur mukammal taur par mil sake.

Tasveer: Bashukriya DGPR Balochistan