Research Officer Nighat Din ka Fisheries Office Pasni ka dora, Micro Lab aur Model Fish Market ka moayena

Pasni: Secretary Fisheries and Coastal Development Balochistan Tariq Qamar aur Director General Fisheries Atiqullah Khan ki khasusi hidayat par Research Officer Madam Nighat Din ne Fisheries Office Pasni ka dora kiya. Is moqe par Assistant Director Shahzeb Sadiq, Mir Khalid Kalmati, Noorudin Hasni, Mir Asif Rind aur Marine Biologist Asadullah bhi mojood the.

Research Officer ne mulazimeen ki hazri, daftari nazm-o-zabt aur mukhtalif shobon ki karkardagi ka jaiza liya, jabke Micro Lab, Model Fish Market aur jari taraqqiati mansubon ka bhi moayena kiya. Assistant Director Fisheries Marine Shahzeb Sadiq ne Pasni mein jari taraqqiati mansubon aur mehkama ki sargarmiyon par tafseeli briefing di.

Nighat Din ne hidayat ki ke paedar mahigeeri, samandari wasail ke tahaffuz, science tehqeeq, Fisheries infrastructure ki behtari aur Mahigeer biradari ki falah-o-behbood ko tarjeeh di jaye taake soobai hukumat ke mahigeeri aur sahili taraqqi ke vision ko moassir andaz mein aage barhaya ja sake.

Tasveer: Bashukriya DG PR Balochistan