Quetta: PTA ki N-25 par karrawai, baghair permit aur kaghzat chalne wali taqriban 27 gariyon ke challan

Quetta: Secretary Transport Balochistan Muhammad Hayat Kakar aur Secretary Provincial Transport Authority (PTA) Balochistan Abdul Majeed Jonjo ki khusoosi hidayat par PTA ke amle ne qaumi shahrah N-25 (Karachi-Chaman) par ghair qanooni aur baghair permit o kaghzat samet deegar dastawezat ke chalne wali gariyon ke khilaf karrawai ki.

Karrawai ke dauran gariyon ke route permits, zaroori kaghzat aur fitness certificates ki jaanch partaal ki gayi, jabke qanooni taqaze poore na karne wali gariyon ke khilaf karrawai amal mein late hue taqriban 27 gariyon ke challan kiye gaye.

Is mushtarka karrawai mein PTA ke amle ke sath Motorway Police ke ahlkaron ne bhi hissa liya. Hukkam ne gariyon ki qanooni haisiyat, safri dastawezat aur fitness certificates ka jaiza liya taake qaumi shahrah par traffic qawanin par amal daramad yaqeeni banaya ja sake.

Karrawai ke dauran ghair qanooni tor par chalne wali gariyon aur dastawezat ki adam dastiyabi samet deegar khilaf warziyon ki nishandahi ki gayi. Hukkam ne wazeh kiya ke route permit, fitness certificate aur deegar lazmi dastawezat ke baghair gariyan chalane walon ke khilaf qanoon ke mutabiq karrawai jari rakhi jaye gi.

Hukkam ke mutabiq is iqdam ka maqsad qaumi shahrahon par traffic qawanin ki pabandi yaqeeni banana, musafiron ke tahaffuz ko behtar banana aur ghair qanooni transport ki rok tham hai. Ghair mulki afrad se mutaliq qanooni taqazon ki jaanch partaal bhi karrawai ka hissa thi.

Mutaliqa amle ko hidayat ki gayi hai ke woh qaumi shahrahon par nigrani aur checking ka amal moassir banayen aur khilaf warzi karne walon ke khilaf bila imtiaz qanooni karrawai aainda bhi jari rakhen.