Quetta mein pani ka bohran: WASA ke 544 mein se 167 tube wells funds ki kami se ghair faal, commissioner Zeeshan Lashari ka ijlas

Quetta: Commissioner Quetta Division Zeeshan Lashari ki zair-e-sadarat Quetta shehar mein shehriyon ko pani ki faraahmi, WASA ki karkardagi aur intizami umoor ke hawale se ijlas munaqid hua, jis mein MD WASA Mujeeb ur Rehman Kakar samet mutaliqa afsaran ne shirkat ki.

MD WASA ne commissioner ko shehar mein faraahmi-e-ab ki soorat-e-haal, WASA ko darpesh mushkilat, ghair faal tube wells, maali masail aur deegar intizami umoor par tafseeli briefing di. Briefing mein bataya gaya ke Quetta shehar mein WASA ke mujmooi taur par 544 tube wells hain, jin mein se 387 faal hain jabke 167 tube wells funds ki kami ke baais ghair faal hain aur un ki marammat nahin ho saki. WASA Quetta mein faraahmi-e-ab ke nizam ko do zones, Chiltan zone aur Zarghoon zone, mein taqseem karke shehriyon ko pani faraham kar raha hai.

Talab 60 million gallon, faraahmi 31 million gallon

Ijlas ko bataya gaya ke Quetta shehar mein shehriyon ki rozana pani ki zaroorat taqriban 60 million gallon hai, jabke WASA is waqt taqriban 31 million gallon pani rozana faraham kar raha hai. Talab aur rasad ke is numayan farq ko badi had tak nijee tube wells ke zariye poora kiya ja raha hai. WASA ke tube wells ke alawa shehar mein taqriban 998 zarai aur 1400 ke qareeb commercial tube wells bhi mojood hain, jin mein se beshtar nijee commercial tube wells ghair registered hain.

MD WASA ne bataya ke WASA ko ghair faal tube wells ki bahali ke sath sath mulazimeen ki tankhwahon, bijli ke bilon, contingency akhrajat, tube wells ki marammat aur deegar zaroori maintenance ke liye izafi funds ki zaroorat hai, aur maali wasail ki kami ke baais mutaddid tube wells ki marammat aur bahali ka amal mutasir ho raha hai.

Ijlas mein bataya gaya ke Quetta shehar mein gharelu o commercial sarifeen ki tadad 97 hazar se zaid hai, jin se WASA ko taqriban 240 million rupay salana revenue hasil hota hai. Soobai budget mein WASA ke liye taqriban 3 arab 705 million rupay mukhtas kiye jate hain jabke idaray ke mujmooi akhrajat 4 arab 64 million rupay se zaid hain, jis ke baais use maali mushkilat ka samna hai. Dasht Wal field band hone ke baais Sariab ke baaz ilaqon mein pani ki faraahmi bhi mutasir hai.

Commissioner Zeeshan Lashari ne hidayat ki ke shehriyon ko pani ki faraahmi yaqeeni banane ke liye tamam mumkina iqdamat kiye jayen, ghair faal tube wells ki bahali aur marammat ke liye moassir iqdamat kiye jayen aur dastiyab wasail ko behtar andaz mein baroe kaar laya jaye. Unhon ne tube wells ko shamsi tawanai par muntaqil karne ke hawale se jame tajaweez murattab karne ki hidayat bhi ki taake bijli ke akhrajat kam hon aur faraahmi-e-ab ka nizam zyada moassir aur paedar bane. Unhon ne kaha ke WASA ke intizami o maali masail ke hal ke sath shehriyon ko bila ta’attul pani ki faraahmi ke liye taweel al-muddati mansooba bandi nagzeer hai.

Tasveer: bashukriya DG PR Balochistan