Quetta mein insdad-e-Polio muhim ka jaiza: Fake finger marking par Deputy Commissioner Mehrullah Badini barham, mutaddid teamein tabdeel

Quetta: Deputy Commissioner Quetta Mehrullah Badini ki zair-e-sadarat insdad-e-Polio muhim ke dusre roz ki paish raft ka jaiza lene ke liye evening review ijlas munaqid hua, jis mein National EOC, District Health Officer (DHO), Deputy DHO, provincial monitors, mutaliqa afsaran aur deegar hukkam ne shirkat ki.

Ijlas mein zila bhar mein Polio muhim ki mujmui karkardagi, OPV (OPV) coverage, fIPV (fIPV) coverage, refusals, school coverage aur teamon ki karkardagi par tafseeli briefing di gayi.

Deputy Commissioner ne tamam monitors, mutaliqa ahalkaron aur Assistant Commissioners ko muhim ke ahdaf ke hasool ke liye wazeh task saunpte hue hidayat ki ke har bachche tak rasai yaqeeni banayi jaye aur kisi ilaqe ko nazar andaz na kiya jaye.

Ijlas mein jali (fake) finger marking aur farzi coverage ke muamlat par sakht barhami ka izhar kiya gaya. Deputy Commissioner ne wazeh kiya ke fake coverage kisi surat bardasht nahin ki jayegi, aur zimmedar ahalkaron ke khilaf karrawai ka hukm dete hue mutaddid Polio teamein tabdeel bhi kar di gayin.

Unhon ne hidayat ki ke tamam field teamein diyanatdari, shafafiyat aur zimmedari se faraiz anjam dein taake har bachche ko Polio se bachao ke qatre pilaye ja sakein aur muhim kamyab ho.

Tasveer: Bashukriya DG PR Balochistan