Quetta mein 21 September se insidad Polio muhim: 4 lakh 41 hazar bachchon ka hadaf, 1800 teamein hissa lengi

Quetta: Deputy Commissioner Quetta Mehrullah Badini ki zer-e-sadarat 21 September se shuru hone wali insidad-e-Polio muhim ke intizamat ke hawale se readiness meeting munaqid hui, jis mein National EOC member, District Coordinator Polio, mutalliqa afsaran aur deegar ne shirkat ki.

Ijlas mein Polio muhim ke plan, teamon ki taynati, security intizamat aur deegar umoor ka jaiza liya gaya. Hukkam ne bataya ke muhim ke dauran 4 lakh 41 hazar bachchon ko Polio se bachao ke qatre pilane ka hadaf muqarrar kiya gaya hai, jabke 1800 teamein muhim mein hissa lengi. Muhim ke liye security plan bhi murattab kar liya gaya hai.

Deputy Commissioner Mehrullah Badini ne kaha ke Polio ke khatme ke liye tamam mutalliqa idare murabbat andaz mein kaam karein aur har bachche tak vaccine ki rasai yaqeeni banai jaye. Unhon ne walidain se appeal ki ke woh Polio teamon se taawun karte hue apne bachchon ko Polio se bachao ke qatre zaroor pilwayein.

Tasveer: Bashukriya DGPR Balochistan