Quetta: Intisad-e-badunwani muqablon ke fateh talba mein naqd inamat taqseem

Quetta: Mahkama School Education Balochistan aur Qaumi Ehtesab Bureau (NAB) Balochistan ke ishtirak se alami yaum-e-intisad-e-badunwani ke hawale se talba mein shaoor o agahi ujagar karne ke liye ek purwaqar taqreeb ka inaqad kiya gaya.

Taqreeb mein mazmoon nawisi, khattati, poster sazi aur taqreeri muqablon mein numayan karkardagi ka muzahira karne wale talba o talibat mein inamat taqseem kiye gaye.

Har saal 9 December ko manaye jane wale alami yaum-e-intisad-e-badunwani ke silsile mein mahkama School Education Balochistan aur NAB Balochistan ki janib se mukhtalif agahi programmon aur taleemi o takhleeqi muqablon ka inaqad kiya jata hai.

Isi silsile mein munaqida mega event mein talba o talibat ne bharpoor shirkat ki aur badunwani ke khatme, diyanatdari, shaffafiyat aur zimmedar shehri hone ke hawale se apni salahiyaton ka izhar kiya.

Taqreeb mein Secretary School Education Balochistan Lal Jan Jaffar, Director NAB Balochistan Muhammad Saleem Ahmed, Director Education Schools Balochistan Akhtar Muhammad Khetran, Director Finance Muhammad Farooq, Chief Executive Officer Balochistan Education Assessment Commission o Director Development, Monitoring and Evaluation Munir Ahmed Notezai, Director Balochistan Education Management Information System Abrar Ahmed, Divisional Director Quetta Zubina Mushtaq aur mahkama Taleem ke deegar aala afsaran ne shirkat ki.

Muqablon ke nataij aur inamat

Urdu aur English mazmoon nawisi, khattati aur poster sazi ke muqablon ke nataij mahireen ki team ne murattab kiye, jabke Urdu aur English taqreeri muqablon ke final bhi munaqid hue.

Taqreeri muqablon mein pehli position hasil karne wale talba ko 7 hazar rupay, doosri position hasil karne walon ko 6 hazar rupay aur teesri position hasil karne walon ko 5 hazar rupay naqd inamat ke sath tareefi asnad aur certificates diye gaye.

Taqreeri muqablon ke munsifin ke faraiz Bureau of Curriculum Quetta ki Nagina Rehman aur Muhammad Yousuf ne shaffaf andaz mein anjam diye.

Taqreeb se khitab karte hue muqarrirein ne kaha ke badunwani ke khatme ke liye muashre mein diyanatdari, shaffafiyat, qanoon ki pasdari aur akhlaqi aqdar ko farogh dena nagzeer hai. Unhon ne is amr par zor diya ke talba ki kirdar sazi aur taleemi idaron mein musbat aqdar ki tarweej ke zariye ek zimmedar aur badunwani se pak muashre ki bunyad rakhi ja sakti hai.

Yaum-e-Azadi aur science numaishon ke inamat

Taqreeb ki ek numayan khususiyat Director Education Schools Balochistan Akhtar Muhammad Khetran ki janib se 14 August ki taqreeb mein talba se kiye gaye naqd inamat ke wade ki takmeel thi.

Is mauqe par Yaum-e-Azadi ki taqreeb mein tilawat-e-Quran Pak, naat khwani, tableau, milli naghmon aur Urdu o English taqareer mein hissa lene wale talba o talibat ko naqd inamat diye gaye.

Government Boys Higher Secondary School Central Quetta ke scouts dastay aur Government Girls High School Mission Road Quetta ke istiqbalia band ke talba ko bhi khusoosi naqd inamat se nawaza gaya.

Director Education Schools Balochistan ne Government Girls High School Mission Road Quetta, Government Girls High School GOR Colony aur Government Girls High School Sirki Kalan Quetta mein munaqida science numaishon ko sarahte hue teenon idaron ki sarbarahan aur amle ko tareefi asnad pesh kin aur apne sabiqa elan ke mutabiq har school ke liye 15 hazar rupay naqd inam faraham kiya.

Is iqdam ka maqsad talba ki science, tehqeeqi aur takhleeqi salahiyaton ki hausla afzai aur taleemi idaron mein sehatmand ilmi sargarmiyon ko farogh dena tha.

Is poore mega event ki intizamat o organization ki zimmedari Director Education Schools Balochistan ne Additional Director Admin Riaz Ahmed Bhangar ko di thi, jinhon ne apne faraiz-e-mansabi intehai ahsan tareeqe se saranjam dete hue is program ko shandar kamyabi se hamkinar kiya aur hukkam-e-bala ki taraf se bharpoor daad aur tehseen ke mustahiq thehre.

Taqreeb ke kamyab inaqad mein Government Girls High School Mission Road Quetta ki principal Salma Akhtar aur un ke amle, District Education Officer Female Quetta Zakia Kakar aur un ki intizami team ne aham kirdar ada kiya.

Taqreeb ke ikhtitam par muazziz mehmanon ko yadgari shields pesh ki gayin.