Quetta Development Package: Zarghoon Road ek mah aur Sariab Service Road do mah mein mukammal karne ki hidayat

Quetta: Commissioner Quetta Division Zeeshan Lashari ki zer-e-sadarat Quetta Development Package ke tahat jari aur naye taraqqiati mansoobon par kaam ki pesh raft, funds ki farahmi aur deegar umoor ka jaiza lene ke liye ijlas munaqid hua.

Ijlas mein Deputy Commissioner Quetta Mehrullah Badini, Deputy Commissioner Quetta West Munir Ahmed Durrani, Divisional Director Development Quetta Division Zahoor Ahmed, Deputy Project Director QDP Muhammad Abid aur deegar mutaalliqa officers shareek hue. Deputy Project Director QDP ne jari mansoobon par kaam ki pesh raft, funds ki farahmi aur darpesh rukawaton se mutaliq tafseeli briefing di.

Commissioner Zeeshan Lashari ne kaha ke Quetta Development Package ek aham taraqqiati mansooba hai jis ki takmeel se shehr mein traffic ke masail par qabu pane ke sath shehriyon ko behtar safari sahulatein mayassar aayengi aur Quetta ko jadeed aur behtar shehr banane mein madad milegi. Unhon ne hidayat ki ke aainda ijlas mein tamam jari aur naye mansoobon ki Google Map ke zariye wazeh nishandehi pesh ki jaye taake har mansoobe ki surat-e-haal, mahal-e-wuqoo aur pesh raft ka mouassir jaiza liya ja sake.

Zarghoon Road aur Sariab Service Road ki deadline

Commissioner ne khusoosi hidayat ki ke Hockey Chowk se Akram Hospital tak Zarghoon Road ki tameer ek mah ke andar mukammal ki jaye taake mansoobe ka barwaqt iftitah mumkin ho, jabke Sariab Service Road ka kaam do mah mein mukammal kiya jaye. Sariab Road par masajid se mutaliq masle par unhon ne Deputy Commissioner Quetta West ko mutaalliqa afrad se rabta karke qabil-e-amal aur qabil-e-qabool hal talash karne ki hidayat ki taake taraqqiati kaam mein mazeed takheer na ho.

Ijlas mein Spinny Sabzal underpass ki tameer ka bhi jaiza liya gaya aur Deputy Commissioner Quetta West ko ab tak ke iqdamaat ka jaiza le kar pesh raft report pesh karne ki hidayat ki gayi. Commissioner ne Assistant Commissioners ko bhi mansoobon ke miyar, raftar aur muqarrara muddat mein takmeel ki nigrani ke liye zaroori hidayat jari karne ka kaha.

Ijlas ko nai schemes ke bare mein bhi briefing di gayi, jin mein Airport Road flyover, Sariab Road flyover, Airport Road pedestrian bridge, Airport Road par zer-e-zameen cables ki tansib aur AG Office ke liye parking plaza ki tameer samet deegar mansoobe shamil hain.

Commissioner ne kaha ke shehr mein barhte traffic masail ke pesh-e-nazar taraqqiati mansoobon mein ghair zaroori takheer bardasht nahin ki jaye gi, rukawatein foran door karke kaam ki raftar tez ki jaye aur musalsal nigrani o bahmi rabte ke zariye package ke samrat jald az jald shehriyon tak pahunchaye jayein.

Tasveer: Bashukriya DG PR Balochistan