Quetta: Chief Minister Balochistan Sarfraz Bugti ka “Sehat Dehleez” app ka elaan, pehle roz 791 calls par muft tibbi mushawarat

Quetta: Chief Minister Balochistan Mir Sarfraz Bugti ne kaha hai ke soobai hukumat ne door daraz aur pasmanda ilaqon ke awam ko ghar baithe muft tibbi mushawarat ki sahulat faraham karne ke liye jadeed digital application “Sehat Dehleez” mutaarif kara di hai, jis ke zariye shehri 24 ghante, saal ke 365 din tajurbakar tibbi mahireen se muft mushawarat hasil kar sakenge.

Samaji rabte ki website X par apne paighaam mein Chief Minister ne kaha ke sehat ki sahuliyat ko jadeed Technology ke zariye awam ki dehleez tak pahunchana hukumat-e-Balochistan ki tarjeehat mein shamil hai. Unhon ne bataya ke app ki faaliyat ke pehle hi roz 791 consultation calls ke zariye shehriyon ko tajurbakar doctors ne muft tibbi mushawarat faraham ki, jo is sahulat ki afadiyat aur awami zaroorat ka wazeh izhaar hai.

Chief Minister ne kaha ke Balochistan ke wasee raqbe, door uftada abadiyon aur baaz ilaqon mein tibbi sahuliyat tak rasai ke masail ke paish-e-nazar jadeed digital zaraye se sehat ki khidmat ki faraahmi ahmiyat rakhti hai. Is app ke zariye shehriyon ko ghar baithe tibbi mushawarat maisar aaye gi, jis se unhein ibtidai rehnumai ke liye taweel safar aur ghair zaroori mushkilat se bachne mein madad milegi.

Unhon ne kaha ke hamara azm hai ke garmi mein jhulaste aur sardi mein thithurte aam Balochistani ko miyari sehat ki sahuliyat ki faraahmi mumkin banai jaye aur jughrafiyai faasle kisi shehri ke liye tibbi rehnumai ke husool mein rukawat na banen.

Chief Minister ne kaha ke Sehat Dehleez jaisi digital sahuliyat awam aur tibbi mahireen ke darmiyan rabte ko aasan banane aur jadeed Technology se istifade ki janib aham qadam hain. Hukumat-e-Balochistan awami zaruriyat ko madde nazar rakhte hue sehat samet bunyadi shobon mein sahuliyat ki behtari ke liye amli iqdamat jari rakhegi.