PPHI Balochistan ne Artificial Intelligence par mabni digital bharti nizam ProMetriX mutaaruf kara diya

Quetta: Peoples Primary Healthcare Initiative (PPHI) Balochistan ke Chief Executive Officer Dr M B Dareejo ne kaha hai ke Chief Minister Balochistan Mir Sarfraz Bugti ke digital governance, shaffafiyat, idaraati islahaat aur merit par mabni bhartiyon ke vizan ke tehat PPHI Balochistan ne Artificial Intelligence par mabni jadeed digital bharti o jaanch ka nizam ProMetriX mutaaruf karaya hai.

Is iqdam ka maqsad bharti ke amal ko jadeed Technology se hum aahang karna, intikhab ke tamam marahil mein shaffafiyat ko farogh dena aur umeedwaron ki qabiliyat o ahliyat ki bunyad par merit ke mutabiq intikhab yaqeeni banana hai. Yeh nizam tele health centers samet bunyadi Sehat ki sahuliyat ke liye darkar ahal aur tarbiyat yafta afradi quwwat ki bharti ko moassar aur munazzam banane mein bhi moaawin hoga.

Online darkhwast se merit list tak

Dr Dareejo ne bataya ke ProMetriX ke zariye online darkhwaston ki jaanch partaal, shanakht ki tasdeeq, taleemi asnaad aur deegar dastawezat ki jaanch, computerized test, jawabat ki jaanch aur merit liston ki tayyari samet bharti ke mukhtalif marahil digital tareeqe se anjaam diye jayenge, jis se amal zyada munazzam, moassar aur qabil-e-aitemad hoga aur intikhab ke marahil mein yaksaniyat barqarar rahegi.

Unhon ne kaha ke PPHI Balochistan soobe ke door daraz aur pasmanda ilaqon mein bunyadi Sehat ki sahuliyat ki faraahmi ke liye koshan hai, jabke tele health centers ke zariye awam ko jadeed Technology ki madad se tibbi mushawarat tak rasai dene ki koshishen bhi aham hain. In marakiz ki moassar faaliyat ke liye mauzoon, ahal aur peshawarana salahiyaton ke hamil amle ki dastiyabi zaroori hai.

Unhon ne mazeed kaha ke ProMetriX mutaaruf karane ka bunyadi maqsad bharti ke amal mein ghair zaroori insani mudakhilat ke imkanat kam karna, aqraba parwari aur merit ke manafi awamil ki hausla shikni karna aur tamam umeedwaron ko musawi mawaqe faraham karna hai, taake ahal aur mustahiq umeedwaron ko munsifana tareeqa kaar ke tehat rozgar ke mawaqe maisar aa sakein.

Chief Executive Officer ne kaha ke PPHI Balochistan Sehat ke shobe mein khidmaat ki behtari, intizami istedad mein izafe aur jadeed Technology ke moassar istemal ke liye amli iqdamat kar raha hai. Unhon ne merit, shaffafiyat, peshawarana salahiyat aur digital governance ke farogh ke liye koshishen jari rakhne ke azm ka izhar karte hue kaha ke ProMetriX ka taaruf idaraati islahaat aur jadeed Technology ke zariye bharti ke nizam ko behtar banane ki jaanib ek aham pesh raft hai.

Tasveer: Bashukriya DGPR Balochistan