Pishin: Commissioner Qaim Khan Lashari ki zer-e-sadarat Sehat ijlas, hospitalon mein adviyaat, amle ki kami aur shamsi tawanai ki hidayat

Pishin: Divisional Commissioner Pishin Qaim Khan Lashari ne kaha hai ke awam ko Sehat ki bunyadi sahuliyat ki faraahmi mein kisi bhi qism ki susti ya ghaflat qatan bardasht nahin ki jaye gi, aur sarkari hospitalon mein aane wale har shehri ko izzat-e-nafs ke ehtiram ke saath behtareen aur jadeed ilaaj ki faraahmi intizamia ki awwalin tarjeeh hai.

Unhon ne yeh baat nau tashkeel shuda Pishin Division mein Sehat ke shobe ko darpesh challenges, intizami islahat aur budget ke umoor ka jaiza lene ke liye munaqida aala satah ke khusoosi ijlas ki sadarat karte hue kahi.

Ijlas mein Divisional Director Health Services Dr Fazal Muhammad Kakar, zilai nazim Sehat Dr Gul Zaman, Medical Superintendent Dr Nasrullah Lango, Medical Superintendent Teaching Hospital Pishin aur Assistant Accounts Officer Muhammad Jahangir Babar samet deegar hukkam shareek hue. Commissioner ko intizami o maaliyati umoor aur hospitalon ki operational haalat par tafseeli briefing di gayi.

Ijlas ke faislay

Ijlas mein Division bhar ke hospitalon mein zindagi bachane wali lazmi adviyaat aur jadeed tashkheesi o tibbi aalaat ki bila-taatul faraahmi aur amle o afradi quwwat ki kami hangami buniyadon par poori karne ka hatmi faisla kiya gaya.

Commissioner ne pasmanda Azla aur door daraz ilaqon mein tibbi nizam ko jadeed khutoot par ustawar karne ke liye bijli ke mutabadil nizam ke taur par tamam marakiz-e-Sehat ko fori taur par shamsi tawanai par muntaqil karne, hospitalon ki imaraat ki hangami marammat aur shobae hadsaat (emergency) ko chaubees ghante faal aur miyari banane ki hidayat bhi jaari kin.

Unhon ne afsaran ko sakhti se takeed ki ke in islahat ke zameeni asraat jald az jald awam tak pahunchayen, kyunke shehriyon ko relief faraham karne mein kisi satah par kotahi ki gunjaish nahin.