Peshkan mein Deputy Commissioner Gwadar ki Khuli Kachehri, mahi geeron aur factory malikan ka chhe maah purana tanaza hal

Gwadar: Chief Minister Balochistan Mir Sarfraz Bugti ke awam dost vision ke tehat awami masail ke fori hal aur shehriyon ko un ki dehleez par relief ki faraahmi ke silsile mein Deputy Commissioner Gwadar Naqeebullah Kakar ne rukn-e-soobai assembly Maulana Hidayat ur Rehman Baloch ke hamrah Peshkan ka daura kiya. Khuli Kachehri aur Balochi diwan ke dauran maqami afraad, mahi geeron, karobari hazraat aur deegar umaidin se mulaqat kar ke un ke masail sune gaye.

Khuli Kachehri mein awam ne arazi, Peshkan jetty ki safai, bunyadi sahuliyat aur deegar masail pesh kiye, jin ke hal ke liye Deputy Commissioner ne mutaliqa mehkamon ko moqe par hi zaroori hidayat jari kin. Unhon ne wazeh kiya ke zila intizamia ke daaira-e-ikhtiyar mein aane wale masail bila taakhir hal kiye jayen, jabke soobai satah se mutaliq muamlat aala hukkam tak pohnchaye jayenge.

Balochi diwan mein chhe maah se jari tanaze ka khaatma

Balochi diwan ke dauran mahi geeron aur karobari o factory malikan ke darmiyan guzishta chhe maah se jari tanaza bhi bahmi mushawarat aur ittefaq-e-raye se hal kara diya gaya. Donon fareeqain ne Deputy Commissioner Naqeebullah Kakar par aitmaad ka izhar karte hue unhen muamla hal karne ka ikhtiyar diya, jis ke baad baqaida muahide par dastakhat kiye gaye.

Muahide ke baad Deputy Commissioner ne donon fareeqain ko baghal geer kara ke ikhtilafat ke khaatme aur bahmi bhai chare ke farogh ki amali misaal qaim ki. Unhon ne kaha ke ilaqe ki taraqqi, maashi sargarmiyon ke farogh aur awami mufad ke liye bahmi taawun, bardasht aur afhaam o tafheem ko farogh dena nagzeer hai.

Peshkan ke awami o samaji halqon ne Maulana Hidayat ur Rehman Baloch aur Deputy Commissioner Naqeebullah Kakar ki janib se awami masail barah-e-raast sunne aur dereena tanaze ko mushawarat ke zariye hal karane ke iqdam ko sarahte hue ise awami khidmat aur moassir intizami kawish qarar diya.

Is moqe par Assistant Commissioner Jiwani Tariq Imam Baloch, Additional Deputy Commissioner General Dr Abdul Shakoor, Fisheries Department ke officers, mahi geer, karobari o factory malikan aur ilaqe ke deegar umaidin bhi mojood the. Zila intizamia Gwadar ne azm zahir kiya ke awami masail ke hal, bunyadi sahuliyat ki behtari, mahi geeron ke mufadat ke tahaffuz aur ilaqe mein aman o bhai chare ke farogh ke liye moassir iqdamat jari rakhe jayenge.

Tasveer: Bashukriya DG PR Balochistan