PDMA Balochistan: Hangami halat mein sinfi bunyad par tashaddud se tahaffuz ke Balochistan framework ka ijra

Quetta: Soobai Disaster Management Authority (PDMA) Balochistan ke zair-e-ehtimam hangami halat mein sinfi bunyad par tashaddud (Gender-Based Violence in Emergencies) ke hawale se Balochistan framework ke ijra ki taqreeb conference hall PDMA Balochistan Quetta mein munaqid hui.

Taqreeb ki sadarat director PDMA Balochistan Naveed Ahmed Sheikh ne ki, jabke mutaliqa sarkari idaron, aqwam-e-muttahida ke idare UNFPA, Australian Aid aur deegar sharakat dar idaron ke numainDgan aur maahireen ne shirkat ki.

Taqreeb ka bunyadi maqsad qudrati afaat, hangami surat-e-haal aur deegar bohrani halat ke dauran khawateen aur ladkiyon samet mutasira afrad ko sinfi bunyad par tashaddud se tahaffuz faraham karne ke liye muassir nizam aur marboot hikmat-e-amli waza karna hai.

«From Preparedness to Protection — Together for a Safer, More Resilient Balochistan» ke unwan se taqreeb mein is azm ka izhar kiya gaya ke Balochistan mein hangami halat se nimatne ke sath sath mutasira abadi ke tahaffuz, bil-khusus khawateen aur kamzor tabqat ke huqooq aur salamati ko bhi yaqeeni banaya jayega.

Muqarrireen ne kaha ke afaat aur hangami halat mein khawateen aur deegar kamzor tabqat ko darpesh khatrat mein izafa ho jata hai, is liye peshgi tayyari, barwaqt tahaffuz, idaron ke darmiyan rabta aur muassir imdadi nizam nagozir hain. Taqreeb mein Balochistan ke liye GBViE framework ko aik aham qadam qarar dete hue is ke muassir nifaz par zor diya gaya.

Tasveer: Bashukriya DG PR Balochistan