PAS ke 48ven batch ke zer-e-tarbiyat afsaran ka PDMA Balochistan headquarters aur Emergency Operation Centre ka daura

Quetta: Pakistan Administrative Service (PAS) ke 48ven batch ke afsaran ne khusoosi tarbiyati program ke silsile mein provincial Disaster Management Authority (PDMA) Balochistan ke headquarters Quetta ka daura kiya, jis ka maqsad unhein Balochistan mein qudrati afat se nimatne, hangami rad-e-amal aur disaster management ke tareeqa-e-kaar se agah karna tha.

Yeh mutalati daura hukumat-e-Balochistan ke Services and General Administration Department (S&GAD) ki darkhast par munaqid kiya gaya, jis mein zer-e-tarbiyat Assistant Commissioners ne shirkat ki. Relief Commissioner o Director General PDMA ki numainda karte hue Director Rescue/Planning and Coordination Naveed Ahmed ne wafd ka istaqbal kiya aur taarufi o interactive session ki sadarat ki.

Session mein Deputy Director Rescue Asghar Ali Jamali, Deputy Director Disaster Risk Management Suleman Aziz, SDO Balach Baloch, Manager Operations Muhammad Fahad samet deegar afsaran ne shirkat ki. Asghar Ali Jamali ne PDMA ke mandate, faraiz aur operational mechanism par briefing dete hue afat se qabl tayyari, fori rad-e-amal, rescue operations mein rabita kari aur imdadi sargarmiyon mein idare ke kirdar par roshni dali.

Briefing mein selab, zalzalon, khushk sali, heat waves aur deegar afat ke dauran hangami iqdamat, rescue o relief operations aur bain-al-idara jati rabita kari se bhi agah kiya gaya. PAS afsaran ne PDMA ke idara jati dhanche, mehkamon ke sath rabita kari aur haliya hangami surat-e-haal ke amali tajrubat mein khusoosi dilchaspi li.

Machinery yard aur Emergency Operation Centre

Baad azan wafd ne PDMA ke aalat o machinery yard ka daura kiya aur bhari machinery, rescue gariyon, ambulances aur deegar khusoosi hangami aalat ka muayena kiya. Unhein bataya gaya ke yeh wasail soobe ke door daraz aur dushwar guzar ilaqon samet hangami surat-e-haal mein barwaqt taynati ke liye hamawaqt dastiyab rakhe jate hain.

Provincial Emergency Operation Centre (PEOC) ke daure mein Manager Operations ne wafd ko markazi command and control system, hangami ittilaat ki monitoring, ibtidai warnings ke ijra aur zilai intizamia o awam tak barwaqt maloomat ki tarseel ke nizam par briefing di. PAS afsaran ne PDMA ki kawishon ko saraha, aur daure ke ikhtitam par group photo banwa kar idaron ke mabain taawun ko mazeed mustahkam banane ke azm ka izhar kiya gaya.

Tasveer: bashukriya DG PR Balochistan