Parliamentary Secretary Nawabzada Mir Zareen Khan Magsi ki wufood se mulaqaaten, taraqqiati kaamon mein shaffafiyat par zor

Quetta: Parliamentary Secretary bara-e-Law, Tourism o Saqafat Nawabzada Mir Muhammad Zareen Khan Magsi ne kaha hai ke awami masail ke hal ke liye hukumat har mumkin iqdam utha rahi hai. Unhon ne yeh baat apne daftar mein halqe aur soobe ke deegar Azla se aaye mukhtalif wufood se guftagu karte hue kahi.

Unhon ne kaha ke taraqqiati kaamon mein shaffafiyat aur barvaqt takmeel waqt ki zaroorat hai aur awam ke buniyadi masail ka hal awwaleen tarjih hai. Un ka kehna tha ke mulk o qaum ka roshan mustaqbil jadeed taleemi nizam mein pinhan hai, aur mulki istehkam o khushhali ke liye nayi nasl ko jadeed Taleem ki targheeb dena zaroori hai takay woh qaumi aur International satah par behtar numainda-gi kar sake.

Nawabzada Mir Zareen Khan Magsi ne wufood ko yaqeen dilaya ke hukumat awami falah ke mansoobe miyar aur waqt ki pabandi ke sath mukammal karne ke liye pur-azm hai aur tamam stakeholders se mukammal taawun kiya jaye ga. Is mauqe par wufood aur sailin ne apne ilaqai aur zaati nauiyat ke masail pesh kiye, jinhein sun kar unhon ne mutaalliqa mehkamana afsaran ko fori ahkamaat jari kiye.

Tasveer: Bashukriya DGPR Balochistan