Parliamentary secretary Liaquat Ali Lehri ki secretary itelaat Imran Khan se mulaqat, hukumati iqdamat awam tak pahunchane par zor

Quetta: Parliamentary secretary transport Mir Liaquat Ali Lehri ne secretary itelaat hukumat-e-Balochistan Imran Khan se mulaqat ki, jis mein soobe mein jari hukumati iqdamat, taraqqiyati sargarmiyon, awami masail aur bahmi dilchaspi ke umoor par tabadla-e-khayal kiya gaya.

Mulaqat mein bil-khusus Quetta mein awami falah-o-behbood ke mansobon aur awam ko darpesh masail par guftagu hui, aur is amr par zor diya gaya ke hukumat ke taraqqiyati mansobon, awami sahuliyat aur falahi iqdamat ko mehkama itelaat ke zariye muassir andaz mein awam tak pahunchane ke liye tamam dastiyab wasail barue kar laye jayenge.

Mir Liaquat Ali Lehri ne kaha ke awam ko hukumati iqdamat aur awami khidmat ke mansobon se barwaqt aagah karna waqt ki aham zaroorat hai. Secretary itelaat Imran Khan ne kaha ke mehkama itelaat hukumat aur awam ke darmiyan rabte ka aham zariya hai aur awami masail ke hal ke liye uthaye jane wale iqdamat ko zimmedarana aur muassir andaz mein ujagar kiya jayega.

Tasveer: Bashukriya DG PR Balochistan