Ormara: DEO Gwadar Abdul Wahab Majeed ka schoolon ka daura, ghair hazir asatiza ke khilaf karrawai jari

Ormara: District Officer Education male Gwadar Abdul Wahab Majeed ne kaha hai ke taleemi idaron mein miyari Taleem, asatiza ki hazri aur talba ke taleemi nataij ki behtari par koi samjhota nahin kiya jaye ga, aur ghair hazir aur faraiz mein ghaflat ke murtakib asatiza ke khilaf qawaid ke mutabiq karrawai jari hai.

Unhon ne yeh baat tehsil Ormara ke taleemi idaron ke daure ke mauqe par kahi, jahan unhon ne Government Boys Middle School Basool, Government Boys Middle School Hud aur Government Boys Middle School Panjgur ka moaina kiya aur asatiza o talba ki hazri, tadrisi sargarmiyon, intizami umoor aur taleemi mahol ka jaiza liya.

DEO ne class rooms mein tadris ka mushahida kiya aur school intizamia aur asatiza ko talba ki baqaida hazri, miyari tadris aur behtar nataij ke liye moassir iqdamat ki hidayat ki. Unhon ne asatiza par zor diya ke woh apni peshawarana salahiyatein barooe kar la kar talba ki taleemi istedad behtar banayein.

Unhon ne Government Girls High School Ormara mein jari chhe rozah literacy o numeracy workshop ka bhi daura kiya aur shareek asatiza se kaha ke workshop mein seekhi gayi jadeed tadrisi maharatein class room mein istemal ki jayein taake talba ki bunyadi khwandagi aur adadi maharat mein paedar behtari aaye. Unhon ne wazeh kiya ke taleemi idaron ki musalsal nigrani aur asatiza ki hazri aur tadrisi miyar ka baqaida jaiza jari rahe ga.

Tasveer: Bashukriya DGPR Balochistan