Ormara: Assistant Commissioner ka dukanon par chhapa, 2010 tak ki zaid-ul-miaad ashiya badi miqdar mein zabt

Ormara: Assistant Commissioner Dr Mah Noor Barkat ne shehar ki mukhtalif marketon mein dukanon ka achanak muayena kiya aur zaid-ul-miaad o naqabil-e-istemal ashiya ki farokht par sakht barhami aur narazgi ka izhar kiya. Unhon ne ashya-e-khurdonosh sameet rozmarra istemal ki ashiya ke miyar aur miaad ka tafseeli jaiza liya.

Muayene ke dauran mutaddid dukanon se zaid-ul-miaad aur naqabil-e-istemal ashiya badi miqdar mein baraamad kar ke zabt kar li gayin, jin mein shampoo, soap, hair oil, body lotion aur mukhtalif ashya-e-khurdonosh shamil hain. Baaz masnuaat par 2010, 2015 aur 2016 ki intehai purani zaid-ul-miaad tareekhein bhi darj payi gayin.

Assistant Commissioner ne wazeh kiya ke shehriyon ki sehat aur zindagi se khelne ki kisi ko ijazat nahin di jayegi. Unhon ne mutalliqa hukkam ko hidayat ki ke zaid-ul-miaad ya ghair miyari ashiya farokht karne walon ke khilaf qanoon ke tehat sakht aur bila-imtiaz karrawai amal mein layi jaye.

Unhon ne kaha ke awam ko muzir-e-sehat aur zaid-ul-miaad ashiya ki faraahmi kisi surat bardasht nahin ki jayegi, jabke khilaf warzi karne wale dukandaron ke khilaf karrawai ke sath sath bazaron mein musalsal aur achanak muayenon ka silsila mazeed muassir banaya jayega. Zila intezamiya ne wazeh kiya ke awami sehat ke huqooq aur mehfooz ashiya ki faraahmi par koi samjhauta nahin kiya jayega.

Tasveer: Bashukriya DGPR Balochistan