Ormara: Assistant Commissioner Dr Mah Noor Barkat ka All Line Departments ijlas, schoolon aur RHC ka daura

Ormara: Chief Minister Balochistan Mir Sarfraz Bugti ke awam dost vision aur Deputy Commissioner Gwadar Naqeebullah Kakar ki hidayat ke mutabiq awam ko behtar, mauassar aur marboot sarkari khidmat ki faraahmi yaqeeni banane ke liye Assistant Commissioner Ormara Dr Mah Noor Barkat ne All Line Departments ke aham ijlas ki sadarat ki.

Ijlas mein Tehsildar Ormara Noor Khan Baloch samet mehkama Sehat, mehkama taleem, baldia Ormara, mehkama samaji behbood, mehkama fisheries, KESC, livestock, B&R, police aur deegar mutaliqa mehkamon ke afsaran ne shirkat ki.

Ijlas ke dauran mukhtalif sarkari mehkamon ke intizami dhanche, bunyadi sahuliyat, jari aur mujawwaza taraqqiyati mansoobon, awami khidmat ki faraahmi, idaara jati karkardagi aur bain-al-mehkamati rabta kari ka tafseeli jaiza liya gaya. Assistant Commissioner ne tamam mehkamon ko hidayat ki ke awami masail ke barwaqt hal, sarkari mansoobon ki shaffaf aur miyari takmeel aur mehkama jati hum ahangi ko mazeed mauassar banaya jaye.

Schoolon aur markaz-e-sehat ka daura

Ijlas ke baad Dr Mah Noor Barkat ne Government Girls High School Ormara ka daura kiya aur jari taraqqiyati kamon ke miyar aur raftar ka jaiza liya. Baad azan unhon ne Government Boys High School Gazi Lane, Ormara mein zer-e-tameer IT Lab ka daura kiya aur mutaliqa hukkam ko mansoobe ki barwaqt takmeel yaqeeni banane ki hidayat ki taake talba jadeed Technology se mustafeed ho sakein.

Unhon ne Rural Health Center (RHC) Ormara ka bhi daura kiya, jahan tibbi sahuliyat, amle ki hazri, mareezon ko faraham ki jane wali khidmat aur majmui intizami umoor ka jaiza liya. Unhon ne hidayat ki ke shehriyon ko miyari aur barwaqt tibbi sahuliyat ki faraahmi mein kisi qism ki ghaflat bardasht nahin ki jaye gi.

Is moqe par Assistant Commissioner ne kaha ke Deputy Commissioner Gwadar Naqeebullah Kakar ki qiyadat mein zilai intizamia awami falah, mauassar governance, taraqqiyati mansoobon ki barwaqt takmeel, taleemi o tibbi idaron ki behtari aur tamam mehkamon ke darmiyan mazboot rabta kari ke liye amli iqdamat kar rahi hai taake tehsil Ormara mein awam ko behtar, shaffaf aur miyari sarkari khidmat faraham ki ja sakein.

Tasveer: bashukriya DGPR Balochistan