Noor Muhammad Dummar ne 14.46 arab rupay ki Khani Baba-Ziarat-Sanjawi road ka iftetah kar diya

Ziarat/Sanjawi: Soobai wazir Commodity Management Department o chairman Balochistan Food Authority Haji Noor Muhammad Khan Dummar ne Khani Baba ta Ziarat ta Sanjawi road ka baqaida iftetah kar diya. Is aham shahrah ki tameer se Ziarat, Sanjawi aur mulhiqa ilaqon ke awam ko safari sahuliyaat ke sath sath tijarati, karobari aur rozgar ke naye mawaqe maisar aane ki umeed hai.

Iftetahi taqreeb mein project director Ismatullah Musakhel, thekedar MPI Construction Company ke owner Fazal Karim Mandokhel, focal person Haji Baz Muhammad Dummar, Muhammad Irfan Dummar, PS to Soobai wazir Moosa Kakar, district chairman Sattar Kakar, district vice chairman Habibullah Panezai, qabaili rehnuma Ghous Panezai, Haji Muhammad Azeem, Malik Ayaz Zakhmail, Azizullah aur Imran Panezai, Sardar Ajab Khan Taran aur Haji Allah Noor samet mutaliqa mahkamon ke afsaran, Ziarat aur Sanjawi ke motabarin o muazzizin aur ilaqe ke deegar afrad mojood the.

Is moqe par project director Ismatullah Musakhel ne Soobai wazir ko mansoobe ke mukhtalif marahil, tameerati kaam aur pesh raft par tafseeli briefing di.

14.46 arab rupay ka mansooba

Iftetah ke moqe par guftagu karte hue Haji Noor Muhammad Khan Dummar ne kaha ke Khani Baba ta Ziarat ta Sanjawi road ka mansooba 14.46 arab rupay ki khatir lagat se tameer kiya ja raha hai, jo ilaqe ki taraqqi aur awam ko behtar safari sahuliyaat ki faraahmi ke hawale se ek aham pesh raft hai. Unhon ne hidayat ki ke mansoobe ko jald az jald paya-e-takmeel tak pahunchane ke liye tamam mutaliqa idare aur zimmedaran apni zimmedariyan ehsan andaz mein anjaam dein.

Unhon ne kaha ke is shahrah ki takmeel se Ziarat, Sanjawi aur gardo-nawah ke awam ko amad-o-raft mein numayan asani hogi, jabke ek soobe se doosre soobe tak safar karne wale shehriyon ke liye bhi safari fasla aur mushkilaat kam hongi. Shahrah se ilaqe mein tijarati sargarmiyon ko farogh milega aur import o export ke sath karobar aur rozgar ke naye mawaqe paida honge.

Soobai wazir ne kaha ke sadken sirf amad-o-raft ka zariya nahin balke kisi bhi ilaqe ki maashi taraqqi, tijarat, sanat, Zaraat aur rozgar ke farogh mein bunyadi kirdar ada karti hain. Is road ki takmeel se khitte ko mulk ke deegar ilaqon se behtar andaz mein mansalik karne mein madad milegi aur maqami logon ke liye taraqqi ke naye raste khulenge. Unhon ne kaha ke hukumat awam ko bunyadi sahuliyaat ki faraahmi aur pasmanda ilaqon ko taraqqi ke dhare mein shamil karne ke liye amali iqdamat kar rahi hai, aur taraqqiyati mansoobon ki barwaqt takmeel se awam ko relief milne ke sath ilaqe ki mujmooi maashi o samaji soorat-e-haal bhi behtar hogi.

Ilaqa makinon ka izhar-e-tashakkur

Ziarat aur Sanjawi ke awam, motabarin aur muazzizin ne mansoobe par khushi ka izhar karte hue Soobai wazir ka shukriya ada kiya aur ise ilaqe ke liye tareekhi aur door ras ahmiyat ka hamil mansooba qarar diya. Unhon ne Soobai wazir ki awami khidmat aur ilaqe ki taraqqi ke liye musalsal kawishon ko saraha aur umeed zahir ki ke shahrah ki takmeel ke baad awam ko mehfooz aur aasan safari sahuliyaat maisar aayengi, jabke Ziarat, Sanjawi aur mulhiqa ilaqon mein karobar, tijarat, siyahat aur rozgar ke mawaqe mein bhi numayan izafa hoga.

Tasveer: bashukriya DGPR Balochistan