Naseerabad mein Hepatitis C ke khilaf aagahi rally, 12 roza muhim mein aik lakh 90 hazar afraad ki screening hogi

Naseerabad: Chief Minister Balochistan Mir Sarfraz Bugti ke vision aur Naseerabad jirga ke samraat samne aane lage hain. Soobai wazir irrigation Mir Muhammad Sadiq Umrani ki kawishon se zila Naseerabad mein wazir-e-azam ke Hepatitis C ki tashkhees o ilaj program ke aaghaz ke silsile mein aagahi rally nikali gayi.

Rally ki qiyadat Assistant Commissioner Chhatar Bashir Ahmed aur District Health Officer Dr Ayaz Jamali ne ki. Rally District Health Office se shuru ho kar Civil Hospital pahunchi, jahan Hepatitis C ki muft screening bhi ki gayi. Shurka ne hathon mein placards aur banners utha rakhe the.

Rally mein Deputy District Health Officer Dr Huzoor Bakhsh Mengal, siyasi o mazhabi rehnuma Haji Rehmatullah Bangulzai, DPC Shabbir Ahmed Marri, Haider Ali, MNCH coordinator Saeed Ahmed aur Sanaullah Chakhra samet mehkama Sehat ke afsaran o ahlkaron ki bari tadad ne shirkat ki.

52 teamein ghar ghar screening karengi

Media se guftagu karte hue District Health Officer Dr Ayaz Jamali ne bataya ke zila bhar mein 12 roza muhim ke dauran aik lakh 90 hazar afraad ki Hepatitis C screening, tashkhees, muft ilaj aur adwiyat ki faraahmi yaqeeni banayi jayegi. Is maqsad ke liye 52 teamein tashkeel di gayi hain jo gali mohallon aur dehi ilaqon mein ghar ghar ja kar awam ki screening karengi.

Unhon ne kaha ke jin afraad ki ibtidai report musbat aayegi, un ke PCR test aur mukammal ilaj bhi hukumati ahkamat ke mutabiq muft faraham kiye jayenge. Unhon ne awam se appeal ki ke woh is qaumi Sehat program se bharpoor faida uthayen.

Assistant Commissioner Naseerabad Bashir Ahmed ne apne khitab mein kaha ke zilai intizamia awam ko Sehat ki bunyadi sahuliyat ki faraahmi ke liye moassir hikmat-e-amli ke tehat iqdamat kar rahi hai aur mehkama Sehat ke sath har mumkin taawun yaqeeni banaya ja raha hai taake awam ko behtar se behtar tibbi sahuliyat faraham ki ja sakein.

Tasveer: Bashukriya DGPR Balochistan