Naseerabad: Mazoor afrad ke wafd ki Deputy Commissioner Virendar Lal se mulaqat, mazoori certificate aur rozgar ke masail uthaye

Naseerabad: Special Persons Organization Naseerabad Balochistan ke registered sadr Bashir Ahmed Mangrio aur general secretary Zulqarnain Bhangar ki sarbarahi mein mazoor afrad ke wafd ne Deputy Commissioner Naseerabad Virendar Lal se mulaqat ki aur zila mein mazoor afrad ko darpesh masail, mushkilat aur bunyadi sahuliyat se mutaliq umoor se tafseeli taur par agah kiya.

Wafd ke arakeen ne bataya ke mazoor afrad ko Social Welfare Department se mazoori ke certificate ke hasool mein mushkilat ka samna hai, jis ke bais unhein sarkari o ghair sarkari satah par dastiyab sahuliyat aur muraat ke hasool mein dushwari pesh aati hai. Wafd ne parhe likhe aurba-salahiyat mazoor afrad ke liye rozgar ke mawaqe paida karne, bil-khusus ghair sarkari tanzeemon (NGOs) mein un ki taleemi qabiliyat ke mutabiq bharti ki zarurat par zor diya, aur mutalba kiya ke mutaliqa mahkamon ko sarkari sahuliyat tak aasan rasai yaqeeni banane ki hidayat jari ki jayen taake unhein muashre ka ba-izzat aur faal hissa banaya ja sake.

Deputy Commissioner Virendar Lal ne wafd ke masail ghaur se sune aur yaqeen dilaya ke mazoor afrad ke jaiz masail ke hal ke liye zilai intizamia har mumkin taawun faraham karegi aur mutaliqa mahkamon ke afsaran se rabta kar ke amli iqdamat uthaye jayenge. Unhon ne kaha ke khusoosi afrad muashre ka aham hissa hain aur un ki falah o behbood, bunyadi huqooq ka tahaffuz aur sahuliyat ki faraham, zilai intizamia ki tarjihat mein shamil hai. Unhon ne yaqeen dehani karai ke mazoori certificates, rozgar ke mawaqe aur deegar jaiz masail ke hal ke liye mutaliqa hukkam se mushawarat kar ke jald iqdamat kiye jayenge.

Tasveer: Bashukriya DG PR Balochistan