Naseerabad ki tehsil Mir Hassan mein Khuli Kachehri, shehriyon ne Taleem, Sehat aur sarkon ke masail pesh kiye

Naseerabad: Deputy Commissioner Naseerabad Virender Lal ki hidayat par awami masail ke fori hal aur zilai intizamia se barah-e-raast rabte ko muassar banane ke liye tehsil Mir Hassan mein Khuli Kachehri munaqid ki gayi, jis ki sarbarahi Assistant Commissioner Dera Murad Jamali Bahadur Khan Khosa aur Assistant Commissioner Chattar Bashir Ahmed ne mushtarka tor par ki.

Khuli Kachehri mein shehriyon ne badi tadad mein shirkat ki aur apne masail bila jhijhak tehriri aur zabani tor par pesh kiye. Awam ne Taleem aur Sehat ki sahuliyat mein behtari, adwiyat ki dastyabi, ambulance service ki faraahmi, fire brigade ke qiyam, taleemi nizam ki behtari, sarkon ki tameer o bahali, zarai pani ki munsifana taqseem aur Aman o Aman ki surat-e-haal samet deegar bunyadi masail ki nishandahi ki.

Khuli Kachehri mein tamam zilai mahkamon ke sarbarahan aur un ke numainde bhi maujood the, jinhon ne mauqe par hi mutaddid masail ke hal ke ehkamat jari kiye, jabke baaz masail mutaliqa mahkamon ko fori karrawai ke liye bhijwa diye gaye.

Assistant Commissioner Bahadur Khan Khosa ne kaha ke maujooda hukumat awami falah o behbood ko apni awwaleen tarjeeh samajhti hai aur awam ke bunyadi masail ke hal ke liye amali iqdamat kiye ja rahe hain. Khuli Kachehriyan awam aur zilai intizamia ke darmiyan barah-e-raast aur muassar rabte ka behtareen zariya hain, jin ke zariye shehri apne masail baghair kisi rukawat ke pesh kar sakte hain.

Unhon ne kaha ke Khuli Kachehri mein samne aane wale tamam masail tarjihi bunyadon par hal kiye jayenge aur mutaliqa mahkamon ko fori aur muassar iqdamat ki hidayat di gayi hai taake awam ko zyada se zyada relief mile. Intizamia awami masail ke paedar hal ke liye sanjeeda iqdamat jari rakhegi.

Tasveer: bashukriya DGPR Balochistan