Naseerabad Health Committee ijlas: DC Verinder Lal ki markaz-e-Sehat mein adviyaat aur amle ki hazri ki nigrani ki hidayat

Naseerabad: Deputy Commissioner Naseerabad Verinder Lal ki zer-e-sadarat District Health Committee ka ijlas munaqid hua, jis mein District Health Officer Dr Ayaz Hussain Jamali, District Support Manager PPHI Tariq Shahbaz, Manzoor Shirazi samet mehkama Sehat aur deegar mehkamon ke afsaran ne shirkat ki.

Ijlas mein zila mein faraham ki jane wali tibbi sahuliyat, buniyadi markaz-e-Sehat ki karkardagi, adviyaat ki dastiyabi, doctors o paramedical staff ki hazri, mareezon ko darpesh mushkilat aur deegar masail ka tafseeli jaiza liya gaya aur afsaran ne Deputy Commissioner ko briefing di.

Deputy Commissioner Verinder Lal ne kaha ke hukumat-e-Balochistan ne awam ko Sehat ki buniyadi aur miyari sahuliyat ki faraahmi ko awwaleen tarjeehat mein shamil rakha hai. Sehat buniyadi insani zaroorat hai, is liye is shobe ke afsaran o ahalkar apni zimmedariyan mehaz sarkari faraiz nahin balke awami khidmat ke jazbe se anjaam dein.

Unhon ne kaha ke door daraz ilaqon ke buniyadi markaz-e-Sehat ko faal rakhna, amle ki barwaqt hazri aur zaroori adviyaat ki wafir dastiyabi yaqeeni banana intihai zaroori hai taake ghareeb aur mutawassit tabqe ke afraad ko maamooli ilaj ke liye bade shehron ka rukh na karna pade. Unhon ne hidayat ki ke zila bhar ke markaz mein adviyaat, amle ki hazri aur sahuliyat ki baqaida monitoring ki jaye aur awami shikayat ko sanjeedgi se liya jaye.

Verinder Lal ne kaha ke mareezon aur un ke lawahiqeen se khush akhlaqi se pesh aana bhi mehkama Sehat ke ahalkaron ki zimmedari hai, aur zilai intizamia mehkama Sehat ke sath bharpoor taawun jari rakhegi taake awam ko un ki dehleez par barwaqt aur miyari tibbi sahuliyat muyassar aa sakein.

Tasveer: bashukriya DGPR Balochistan