Naseerabad: Deputy Commissioner Virender Lal ki zair-e-sadarat monsoon season ke peshgi hifazati iqdamat par ijlas

Naseerabad: Deputy Commissioner Naseerabad Virender Lal ki zair-e-sadarat monsoon season ke dauran mumkina barishon aur sailabi surat-e-haal se nimatne ke liye peshgi hifazati iqdamat ke hawale se aham ijlas munaqid hua, jis mein tamam mutaliqa mehkamon ke zilai sarbarahan ne shirkat ki.

Ijlas mein saal 2010 aur 2022 mein hone wali shadeed barishon aur sailabi surat-e-haal ke tajurbat ka tafseeli jaiza liya gaya. Deputy Commissioner ne hidayat ki ke maazi ke tajurbat ko madde-nazar rakhte hue abhi se mouassar aur jaame hifazati iqdamat yaqeeni banaye jayen taake kisi bhi hangami surat-e-haal se barwaqt aur behtar andaz mein nimta ja sake.

Virender Lal ne kaha ke har idara apni zimmedariyan mukammal sanjeedgi aur peshawarana andaz mein ada kare aur kisi qism ki kotahi ya ghaflat bardasht nahin ki jayegi. Unhon ne hidayat ki ke tamam machinery ko fori tor par faal aur marammat shuda halat mein rakha jaye aur hassas aur nasheebi ilaqon ke qareeb taenat kiya jaye taake hangami halat mein barwaqt istemal mumkin ho sake.

Unhon ne kaha ke agarche qudrati afat ko mukammal tor par rokna mumkin nahin, taham barwaqt aur mouassar peshgi iqdamat ke zariye jani o maali nuqsanat ko numayan had tak kam kiya ja sakta hai, aur is ke liye tamam idaron ke darmiyan bahmi rabta aur hum ahangi nihayat zaroori hai taake kisi bhi nakhushgawar surat-e-haal mein fori aur mouassar rad-e-amal diya ja sake.

Tasveer: Bashukriya DGPR Balochistan