Naseerabad: Commissioner Salahuddin Nurzai ki zer-e-sadarat promotion committee ka ijlas, patwariyon ki qanungo ke ohde par taraqqi ka jaiza

Naseerabad: Commissioner Naseerabad Division Salahuddin Nurzai ki sarbarahi mein Revenue Department ke mulazimeen ki taraqqiyon se mutaliq promotion committee ka ijlas munaqid hua. Ijlas mein S&GAD ki numainda-gi karte hue Assistant Commissioner Bahadur Khan Khosa, Senior Accounts Officer Naseerabad Ajab Khan Mandokhel, Abdul Samad Khosa aur Sherullah Khosa ne shirkat ki.

Ijlas mein senior patwariyon ko qanungo ke ohde par taraqqi dene ke liye tamam qanooni taqazon aur qawaid o zawabit ka bareek beeni se jaiza liya gaya.

Committee ke chairman Commissioner Salahuddin Nurzai ne kaha ke hamari hamesha yehi koshish rahi hai ke sirf unhi senior patwariyon ko taraqqi di jaye jo qawaid ke mutabiq is ke haqdar hain, kyunke is se mulazimeen mein pai jane wali mayoosi ka khatma hoga aur woh mazeed jazbe aur zimmedari ke sath awami khidmat aur mufad-e-aamma ke liye apni salahiyatein barooe kar laein ge.

Tasveer: Bashukriya DGPR Balochistan