NAB Balochistan ka Leaders Odyssey School and College Quetta mein ‘corruption ke khatme mein talba ka kirdar’ par aagahi lecture

Quetta: Bad-unwani ke khilaf jari aagahi muhim ke silsile mein NAB Balochistan ne Leaders Odyssey School and College Quetta mein «bad-unwani ke khatme mein talba ke kirdar aur NAB ke kaam ka tareeqa-e-kaar» ke mauzu par aagahi lecture ka inqiad kiya. Lecture ka maqsad naujawanon bil-khusus talba ko bad-unwani ke muzir asraat se aagah karna aur bad-unwani se paak muashre ki tameer ke liye ijtimai koshishon ko farogh dena tha.

NAB Balochistan ke Deputy Director Farhan Yousuf Khan ne talba aur faculty se guftagu mein NAB ke vision, mission aur bad-unwani ki laanat ke khatme mein talba ke aham kirdar par roshni dali. Unhon ne zor diya ke naujawan muashre mein tabdeeli ke liye kaleedi kirdar ada karen, apni zindagiyon mein diyanat daari aur ehtesab ko bunyad banayen aur bad-unwani se nafrat ko apni shakhsiyat ka hissa banayen.

Islami taleemat ka hawala dete hue unhon ne kaha ke khud ehtesabi aur diyanat daari Islam ke bunyadi usool hain aur bad-unwani ki kisi qism ki ijazat nahin di ja sakti. Lecture mein aqraba parwari, rishwat, sifarish, zor zabardasti aur jaanib-daari ko corruption ki aqsam ke taur par gardana gaya aur is par afsos ka izhar kiya gaya ke yeh rawaiye hamare muashre mein maamool ban chuke hain.

Is mauqe par Leaders Odyssey School and College ki Vice Principal Miss Fareeha aur lecturer Muhammad Akmal ne NAB Balochistan ki koshishon ko saraha aur kaha ke talba bad-unwani ke khilaf shaoor hasil karen taake imandari, diyanat daari aur jawab dehi ke dars ko farogh diya ja sake. Unhon ne kaha ke talba ki ijtimai koshishen bad-unwani se paak muashre ki bunyad rakhne mein aham kirdar ada kar sakti hain aur aainda bhi insidad-e-bad-unwani muhim mein bharpoor taawun ki yaqeen dehani karai. Lecture ke ikhtitam par NAB Balochistan ki jaanib se Vice Principal ko yadgari shield pesh ki gayi.

Tasveer: bashukriya DGPR Balochistan