N-25 dualization mansooba: Secretary Communications Babar Khan ki zair-e-sadarat project facilitation committee ka ijlas

Quetta: N-25 dualization mega mansoobe se mutaalliq project facilitation committee ka aham ijlas Secretary Communications o Taameraat Babar Khan ki zair-e-sadarat munaqid hua, jis mein mansoobe par jari pesh raft, darpesh masail aur un ke hal ke liye mukhtalif umoor ka tafseeli jaiza liya gaya.

Ijlas mein Member National Highway Authority Balochistan Basharat Hussain, Frontier Works Organization ke Colonel Shahid Abbasi, GM Karachi-Khuzdar section Kashif Sheikh, Project Director N-25 Kuchlak ta Chaman Riaz Ahmed, Director Legal NHA Abdul Mannan aur Chief Engineer Federal Projects Dr Sajjad Baloch bazariya Zoom shareek hue, jabke mutaalliqa mahkamon ke deegar aala hukkam ne bhi shirkat ki.

Bypasses, crush plants aur Shajarkari

Ijlas ko mansoobe ki mujmui pesh raft par tafseeli briefing di gayi. Briefing ke dauran N-25 par waqe shehron aur qasbon mein bypasses ki tameer, mansoobe se mutaalliq mukhtalif idaraati aur security satah ke umoor, crush plants ki muntaqili aur shahrah ke atraf Shajarkari muhim samet deegar aham nukaat par ghaur kiya gaya. Mutaalliqa hukkam ne mukhtalif muamlaat par pesh raft, darpesh rukawaton aur un ke mumkina hal se bhi aagah kiya.

Secretary Communications o Taameraat Babar Khan ne ijlas se khitab karte hue kaha ke N-25 dualization soobe ke liye intihai aham nauiyat ka mega mansooba hai, jis ki takmeel Balochistan ki muashi aur samaji taraqqi mein sang-e-meel sabit hogi. Unhon ne kaha ke yeh mansooba na sirf safri sahuliyat behtar banayega balke tijarati sargarmiyon mein izafe, safri daurani mein kami aur shahrah par traffic ke mehfooz aur muassir nizam ko yaqeeni banane mein bhi aham kirdar ada karega.

Unhon ne kaha ke mansoobe ki barwaqt aur miyari takmeel hukumat ki avvalin tarjeehat mein shamil hai, is liye tamam mutaalliqa idaare baahmi taawun aur muassir rabita kari ke zariye darpesh masail jald az jald hal karein taake mansooba muqarrara muddat mein mukammal ho sake.

Ijlas ke ikhtitam par mutaalliqa idaron ko mukhtalif umoor par zaroori hidayat jari ki gayin aur is azm ka izhar kiya gaya ke N-25 dualization mansoobe ko tez raftari se mukammal kar ke awam ko jadeed, mehfooz aur miyari safri sahuliyat faraham ki jayengi.

Tasveer: Bashukriya DGPR Balochistan