Mushir Taraqqi-e-Niswan Dr Rubaba Buledi ko naye Secretary Sher Shah Ghalzai ki mehkamajati briefing

Quetta: Chief Minister Balochistan ki Mushir baraye Women Development Department Dr Rubaba Khan Buledi se Women Development Department ke naye tainaat hone wale Secretary Sher Shah Ghalzai ne mulaqat ki aur unhein mehkame ki karkardagi, jari projects, mukhtalif programs aur majmooi mehkamajati umoor ke hawale se tafseeli briefing di.

Secretary Sher Shah Ghalzai ne Mushir Chief Minister ko mehkame ki janib se khawateen ki falah-o-bahbood, taraqqi, tahaffuz aur unhein maashi o samaji taur par baikhtiyar banane ke liye jari iqdamat se agah kiya.

Dr Rubaba Khan Buledi ne mehkame ki karkardagi ka jaiza lete hue khawateen ki taraqqi aur unhein muashre mein moassar aur bawaqar maqam faraham karne ke liye jari iqdamat ko mazeed moassar banane ki zaroorat par zor diya. Unhon ne kaha ke khawateen ki falah-o-bahbood aur unhein taraqqi ke yaksan mawaqe ki faraahmi hukumat-e-Balochistan ki tarjihat mein shamil hai.

Mushir Chief Minister ne mehkame ke umoor mein shaffafiyat, moassar nigrani aur behtar service delivery ko yaqeeni banane ki hidayat karte hue kaha ke khawateen se mutaalliq hukumati programs ke samarat soobe ke door daraz ilaqon tak pahunchaye jayen.

Tasveer: Bashukriya DG PR Balochistan