Musakhel: Zamindar Action Committee ki Deputy Commissioner se mulaqat, gajar booti ke khilaf spray muhim ka mutalba

Musakhel: Deputy Commissioner Abdul Razzaq Khajak se Zamindar Action Committee ke wafd ne sadr Malik Ismatullah ki qiyadat mein mulaqat ki, jis mein zila Musakhel mein kisanon aur zamindaron ko darpesh masail aur Zaraat ki behtari se mutaliq mukhtalif umoor zer-e-behas aaye.

Wafd ne zila mein tezi se phailne wali muzir-e-Sehat aur faslon ko nuqsan pohanchane wali jari booti Parthenium (gajar booti) samet digar jari bootiyon ke khatraat se agah kiya aur zarai zameenon ko bachane ke liye fori aur muassir spray muhim chalane ka mutalba kiya.

Wafd ne haliya barishon ke baais kisanon ki tayyar faslon aur baghat ko pohanchne wale shadeed nuqsanat ki tafseelat se bhi agah kiya, jabke mutasira zamindaron ki bahali aur imdad ka mamla bhi zer-e-ghaur aaya.

Wafd ne zila Musakhel ke qudrati mahol ko zaitoon (Olive) ki kasht ke liye sazgar qarar dete hue is ke maashi aur zarai fawaid par tafseeli guftagu ki taake maqami kisanon ko zaitoon ki kasht ki taraf raghib kiya ja sake. Is moqe par wafd ne Deputy Commissioner ko yaqeen dilaya ke woh hukumat ke sath har mumkin taawun ke liye tayyar hain.

Tasveer: bashukriya DGPR Balochistan