Musakhel: Deputy Commissioner Abdul Razzaq Khajak ki zer-e-sadarat BSDI mansoobon ka jaiza ijlas

Musakhel: Deputy Commissioner Musakhel Abdul Razzaq Khajak ki zer-e-sadarat Balochistan Special Development Initiative (BSDI) Phase I, II aur III ke tahat mukammal, jari aur mujawwaza mansoobon ke hawale se jaiza ijlas munaqid hua.

Ijlas mein Assistant Commissioner Musakhel Najibullah Kakar, Assistant Commissioner Drug Azharuddin, Field Engineer Hamza Khan aur muta’alliqa mahkamon ke sarbarahon ne shirkat ki. Ijlas mein BSDI ke tahat mukammal hone wali, jari aur nayi tajaweez par mushtamil schemes ki pesh-raft ka tafseeli jaiza liya gaya.

Deputy Commissioner Abdul Razzaq Khajak ne hidayat ki ke tamam taraqqiyati kaamon mein shaffafiyat aur miyar ko har soorat yaqeeni banaya jaye aur jari mansoobe muqarrara muddat ke andar mukammal kiye jayen. Unhon ne kaha ke awami falah-o-behbood ke in mansoobon mein kisi qism ki kotahi bardasht nahin ki jayegi.

Field Engineer Hamza Khan ne briefing dete hue kaha ke taraqqiyati mansoobon mein miyar aur shaffafiyat ko madd-e-nazar rakha jaye, kisi bhi qism ki ghaflat bardasht na ki jaye aur muqarrara ahdaf ke husool ke liye tamam takneeki umoor barwaqt mukammal kiye jayen.

Tasveer: Bashukriya DGPR Balochistan