Musakhel: Deputy Commissioner Abdul Razzaq Khajak ki Deputy Director Zaraat Shams ul Haq se mulaqat, jaali khad par baat cheet

Musakhel: Deputy Commissioner Abdul Razzaq Khajak se Deputy Director Zaraat Tawseea Shams ul Haq ne aham mulaqat ki.

Mulaqat ke dauran zila bhar ke kisanon aur zamindaron ko darpesh mukhtalif masail, bil-khusus market mein ghair qanooni jaali aur muzir-e-Sehat khad aur zarai adwiyat ki farokht ka mamla tafseeli taur par zer-e-behas aaya.

Deputy Director Zaraat ne zila ke kisanon ko darpesh zarai mushkilat aur barwaqt miyari khad o adwiyat ki adam dastyabi se agah kiya. Bazaron mein naqis, ghair miyari aur muzir khad o adwiyat bechne wale anasir ke khilaf sakht qanooni karrawai aur crackdown par baat cheet ki gayi.

Deputy Commissioner Abdul Razzaq Khajak ne mutaliqa hukkam ko hidayat ki ke market mein chemical o zarai adwiyat ki dukanon ki baqaida jaanch partal (inspection) ki jaye taake kisanon ko muashi aur zarai nuqsan se bachaya ja sake aur miyari zarai ajnas ki faraahmi yaqeeni banai ja sake.

Tasveer: Bashukriya DGPR Balochistan