Mir Kalmati School Sports Festival Gwadar: Darul Uloom Public School ki Football mein fatah, Girls Cricket finalists tay

Gwadar: Hukumat-e-Balochistan ki Khel dost policy, nawjawanon ko sehatmand o musbat sargarmiyon ke mawaqe ki faraahmi aur khelon ke zariye talaba o talibaat ki salahiyyaten ujagar karne ke azm ke tehat Mir Arshad Kalmati ke zer-e-ahtemam aur Mir Abdul Ghafoor Kalmati Football Academy ke taawun se jari Mir Kalmati Inter Educational School Sports Festival 2026 ke chhatay aur satwen roz bhi mukhtalif khelon ke muqable bharpoor josh o kharosh se jari rahe.

Football: Darul Uloom Public School ki 1-0 se jeet

Festival ke chhatay roz Surag Dil Football Stadium Gwadar mein Government Boys High School Ghati Dhor Gwadar aur Darul Uloom Public School Gwadar ke darmiyan dilchasp Football muqabla hua. Dono teamon ne behtareen khel aur bharpoor jazbe ka muzahira kiya, taham Darul Uloom Public School ne faisla kun goal score kar ke muqabla 1-0 se apne naam kar liya.

Is mauqe par mehman-e-khusoosi principal Darul Uloom Public Secondary School Gwadar Qasim Baloch samet Sports Festival committee ke arkan, asatiza aur deegar muazzizeen maujood the, jinhon ne khilariyon ki hausla afzai ki aur festival ke inaqad ko saraha. Match mein Shahzaman ne referee jabke Wahid Haji aur Anis Karim ne assistant referees ke faraiz anjam diye.

Girls Cricket ke semi finals

Festival ke satwen roz girls event mein Cricket ke do sansani khez semi finals khele gaye. Pehle semi final mein Government Girls Higher Secondary School Gwadar ne Bahria Model College Gwadar ko shikast de kar final mein jagah banayi, jabke doosre semi final mein Gwadar Grammar School ne Newtown Grammar School ko hara kar final ke liye qualify kiya. Dono fateh teamen peer ko final mein mad-e-muqabil hongi.

Satwen roz ki mehmanan-e-khusoosi Government Girls Higher Secondary School Gwadar ki senior teacher Madam Fahmida Bashir aur Dr Firoza Asghar thin, jabke Sports Festival committee ki khawateen arkan aur deegar muazzizeen bhi maujood the. Mehmanan-e-khusoosi ne talibaat ki hausla afzai karte hue kaha ke talibaat ko khelon samet musbat aur sehatmand sargarmiyon ke mawaqe faraham karna khush aaind iqdam hai, jis se un ki salahiyyaten nikharti hain aur woh muashre mein faal kirdar ada karne ke liye tayyar hoti hain.

Mir Kalmati Inter Educational School Sports Festival Hukumat-e-Balochistan ki Khel dost policy ke amali farogh ki aik musbat misal hai, jis ka maqsad nawjawan nasl mein sehatmand musabiqat, nazm o zabt, team work aur khelon ka jazba parwan charhane ke sath sath talibaat ko bhi khelon ke maidan mein aage barhne ke musawi mawaqe faraham karna hai. Festival ke inaqad mein mahkama Taleem Gwadar, Gwadar Development Authority, Private Schools Association Gwadar aur mahkama Khel Gwadar ka taawun hasil hai.

Tasveer: Bashukriya DGPR Balochistan