Mehkama Mahaulyat mein lawaheqeen quota par 6 umeedwaron ko tayyuni orders, mushir Naseem ur Rehman Malakhail ka khitab

Quetta: Wazir-e-aala Balochistan ke mushir bara-e-mahaulyat o mausamiyati tabdeeli Naseem ur Rehman Khan Malakhail ne 7 September ko mehkama mahaulyat o mausamiyati tabdeeli ke zer-e-ehtimam taqreeb mein lawaheqeen quota ke tehat 6 umeedwaron ko tayyuni naame diye, jin ka muamla kafi arsay se zer-e-iltiwa tha.

Taqreeb ki sadarat mushir mahaulyat ne ki, jabke secretary mahaulyat Noor Muhammad Purani aur DG mahaulyat Zahoor Baloch samet mehkame ke deegar aala afsaran bhi mojoodthe.

Naseem ur Rehman Khan Malakhail ne kaha ke sarkari mulazimeen apne faraiz imandari se anjaam dein to soobe ke door daraz ilaqon se aane wale sailin ke masail jald hal ho sakte hain. Unhon ne lawaheqeen quota ke tehat bharteon ka marhala ahsan andaz mein mukammal karne par secretary aur DG mahaulyat ko mubarakbad ka mustahiq qarar diya.

Unhon ne kaha ke mutawaffi sarkari mulazimeen ke lawaheqeen ko un ka haq dena mehkama mahaulyat ki awwaleen tarjeeh hai aur hukumati hidayat ki roshni mein baqi zer-e-iltiwa cases bhi jald az jald nimtaye jayenge. Mehkame mein shafafiyat aur merit yaqeeni banane ke liye tamam bharteyan qawaid o zawabit ke mutabiq mukammal ki gayin, aur ab mulazmat hasil karne walon ki zimmedari hai ke apni duties ikhlas aur imandari se anjaam dein.

Is mauqe par naw-taynaat mulazimeen ne mushir mahaulyat Naseem ur Rehman Malakhail aur mehkama mahaulyat ka shukriya ada kiya.

Tasveer: Bashukriya DG PR Balochistan