Meena Majid Baloch ki 69vein Commonwealth Parliamentary Conference Cape Town mein Asia ke naujawanon ki numainda-gi

Quetta: Soobai mushir Khel o umoor naujawanan Meena Majid Baloch ne 69vein Commonwealth Parliamentary Conference mein Balochistan aur Pakistan ke naujawanon ki numainda-gi ki aur naujawanon ke masail, mawaqe aur mustaqbil par izhar-e-khayal karte hue faisla sazi aur policy sazi mein un ki moassir shamooliyat par zor diya.

Junubi Africa ke shehar Cape Town mein munaqida 69vein Commonwealth Parliamentary Conference ke alami parliamentary forum par 16 September ko hone wale Youth Roundtable mein Balochistan se taluq rakhne wali naujawan MPA ne poore Asia region ke naujawanon ki numainda-gi karte hue Pakistan, bil-khusus Balochistan ke naujawanon ki tarjumani ki, aur khitte ke naujawanon ke masail, salahiyaton, tawanai aur mustaqbil ke imkanat ko alami parliamentary biradari ke samne ujagar kiya.

Pakistan ki 62 feesad abadi naujawan

Meena Majid Baloch ne kaha ke yeh fakhr ki baat hai ke Pakistan ki jamhoori assemblyon mein taqriban 30 feesad naujawan numainda-gi kar rahe hain, jabke Pakistan ki 62 feesad abadi naujawanon par mushtamil hai. Unhon ne kaha ke yeh naujawan tawanai, salahiyat, hunar aur azm se mala mal hain aur mulk ko taraqqi, khushhali aur roshan mustaqbil ki janib le jane ki bharpoor salahiyat rakhte hain.

Commonwealth Parliamentary Conference daulat-e-mushtarka ke mumalik ki parliamentson ka aham salana alami platform hai, jahan parliamentarians, parliamentary hukkam aur policy saz mushtarka alami, parliamentary aur samaji umoor par tabadla-e-khayal karte hain. Rawan saal ki conference mein mukhtalif parliamentson se sakinon parliamentarians, parliamentary staff aur faisla sazon ne shirkat ki.

Tasveer: Bashukriya DGPR Balochistan