Maulana Hidayat ur Rehman ka Gwadar ke schoolon mein attachment par tashweesh ka izhar, amle ko asal tainati par wapas bhejne ki hidayat

Gwadar: Rukn-e-soobai assembly Balochistan Maulana Hidayat ur Rehman Baloch ne District Education Officer Gwadar Zahid Baloch ke daftar mein Taleem ki behtri se mutaliq ijlas ki sadarat ki, jis mein taleemi nizam ki behtri, schoolon mein tadreesi o ghair tadreesi amle ki dastiyabi aur deegar taleemi umoor ka tafseeli jaiza liya gaya.

Maulana Hidayat ur Rehman ne schoolon mein asatiza aur zaroori amle ki barwaqt dastiyabi ko taleemi miyar ki behtri ki bunyadi zaroorat qarar dete hue attachment ke maamle par tashweesh ka izhar kiya. Unhon ne hidayat ki ke attachment ke baais jin sarkari schoolon mein staff ki kami paida ho rahi hai, is ka jaiza le kar mulazimeen ko un ki asal jaye tainati par wapas bhejne ke moassir iqdamat kiye jayen.

Un ka kehna tha ke asatiza ki maujoodgi, hazri, merit par tainati aur moassir afradi quwwat taleemi nizam ke bunyadi sutoon hain, is liye dastiyab insani wasail ko talba ki zaroriyat ke mutabiq munazzam kiya jaye taake kisi school mein asatiza ya amle ki kami se tadrees mutasir na ho. Unhon ne afsaran par zor diya ke schoolon ki karkardagi, asatiza ki hazri, talba ki zaroriyat aur bunyadi sahuliyat ki baqayda nigrani ki jaye aur masail tarjeehi bunyadon par hal kiye jayen.

Seerat un Nabi programme

Ijlas mein Seerat un Nabi ke hawale se taleemi o tarbiyati programmon par bhi mushawarat hui aur tay paya ke 24 August ko Pasni aur 25 August ko Gwadar mein Seerat un Nabi ke khusoosi programme munaqid kiye jayenge.

Rukn assembly ne kaha ke Taleem ka maqsad sirf nisabi ilm nahin balke talba ki akhlaqi tarbiyat, kirdar sazi, nazm o zabt aur musbat iqdar ka farogh bhi hai, aur Seerat un Nabi ke programme talba mein aala akhlaq, bardasht, ehtram, diyanat aur khidmat-e-khalq ke jazbe ko farogh dene ki musbat kawish hain.

Tasveer: Bashukriya DG PR Balochistan